കണ്ണൂര്‍: സഹകരണ മേഖലയില്‍ കഴിവുതെളിയിച്ച മികച്ച സഹകാരിയാണ് ഇന്നലെ അന്തരിച്ച കെ.പി നൂറുദ്ദീന്‍. തന്റെ അധ്വാനം കൊണ്ടു സ്ഥാപിച്ച സഹകരണ പ്രസ്ഥാനങ്ങളോരോന്നും മികവിന്റെ ഉന്നതിയിലെത്തിക്കാന്‍ അദ്ദേഹം കഠിനാധ്വാനം നടത്തി.
അദ്ദേഹത്തിന്റെ നേതൃത്വത്തില്‍ സ്ഥാപിച്ച പയ്യന്നൂര്‍ ടൗണ്‍ കോ ഓപ്പറേറ്റീവ് ബേങ്ക് ഇന്നു സംസ്ഥാനത്തെ മികച്ച സഹകരണ ബേങ്കുകളിലൊന്നാണ്.
അതു മാത്രമല്ല കളങ്കമോ അഴിമതിയോ തൊട്ടു തീണ്ടാത്ത രീതിയില്‍ കെ.പി നൂറുദ്ദീന്‍ സ്ഥാപിച്ച സ്ഥാപനങ്ങളോരോന്നും മുന്നോട്ടുപോകുന്നുവെന്നതും അദ്ദേഹം മികച്ച സഹകാരിയാണെന്നതിന്റെ തെളിവാണ്. സഹകരണ സ്ഥാപനങ്ങളില്‍ മാത്രമല്ല, സംസ്ഥാന മന്ത്രിയായിരുന്ന കാലത്തും അദേഹത്തിനുമേല്‍ ഒരു അഴിമതിയാരോപണം പോലും ഉന്നയിക്കപ്പെട്ടിട്ടില്ലെന്നത് അദ്ദേഹത്തിന്റെ സാമ്പത്തിക അച്ചടക്കത്തിന്റെയും കാര്യങ്ങള്‍ നേരായവഴിയില്‍ മാത്രം നടത്തുമെന്നതിന്റെയും തെളിവാണ്.