കൊണ്ടോട്ടി: പുകയില ഉല്‍പ്പന്നങ്ങളുമായി ദോഹയിലേക്ക് പോകാനെത്തിയ യാത്രക്കാരന്‍ കരിപ്പൂര്‍ വിമാനത്താവളത്തില്‍ പിടിയിലായി. തലശ്ശേരി നന്ത്യാര്‍പീടിക റഷീദ മന്‍സിലില്‍ മുഹമ്മദ് അസീസ്(27)ആണ് പിടിയിലായത്.
രാവിലെ 10.40നുള്ള ഇന്‍ഡിഗോ വിമാനത്തില്‍ പോകാനായാണ് ഇയാള്‍ കരിപ്പൂരിലെത്തിയത്. ബാഗേജ് പരിശോധനയില്‍ സംശയം തോന്നിയ കസ്റ്റംസ് വിഭാഗം ബാഗ് തുറന്ന് പരിശോധിച്ചപ്പോഴാണ് 30 കിലോ ഹാന്‍സ് കണ്ടെത്തിയത്. മൂന്ന് ലക്ഷത്തോളം രൂപ വില ലഭിക്കും. കരിപ്പൂര്‍ വിമാനത്താവളത്തില്‍ കഴിഞ്ഞ ദിവസം ദോഹയിലേക്കു പോകാനെത്തിയ കോഴിക്കോട് കൊടുവള്ളി പുത്തന്‍ വീട്ടില്‍ മുബ്‌സില്‍(21)നിന്ന് ഒരു കിലോ കഞ്ചാവ് പിടികൂടിയിരുന്നു. അരയില്‍ കെട്ടിയ നിലയില്‍ ഒരു കിലോ കഞ്ചാവാണ് ഇയാളില്‍ നിന്ന് പിടികൂടിയത്. രണ്ടുസംഭവങ്ങള്‍ക്കും ബന്ധമുണ്ടോയെന്ന് പരിശോധിച്ചു വരികയാണ്.