കൊല്ലം: ഒ.വി.വിജയന്റെ ഖസാക്കിന്റെ ഇതിഹാസം എന്ന നോവിലിനെ അധികരിച്ച് ആര്‍ട്ടിസ്റ്റ് സലിംബാബു വരച്ച ചിത്രങ്ങളുടെയും പെയിന്റിങുകളുടെയും പ്രദര്‍ശനം നാളെ മുതല്‍ കൊല്ലം ആശ്രാമം എട്ട് പോയിന്റ് ആര്‍ട്ട് കഫേയില്‍ നടക്കും.രണ്ടാഴ്ച നീണ്ടുനില്‍ക്കുന്ന പ്രദര്‍ശനം രാവിലെ പത്തിന് മേയര്‍ വി.രാജേന്ദ്രബാബു ഉദ്ഘാടനം ചെയ്യും. 19 ചിത്രങ്ങളാണ് പ്രദര്‍ശനത്തിനുള്ളത്.ഇസൈ സ്‌കൂള്‍ ഒഫ് ഐഡിയാസിന്റെ ആഭിമുഖ്യത്തില്‍ നടത്തുന്ന പ്രദര്‍ശനത്തിന് മൈന്റ് സ്‌കേപ്‌സ് ഒഫ് എ റീഡര്‍ എന്നാണ് പേരിട്ടിരിക്കുന്നത്.
ഇതിഹാസ തുല്യമായ നോവലിന്റെ വായനക്കാരനായ ചിത്രകാരന്റെ സമീപനങ്ങളും  അനുഭവങ്ങളുമാണ്  വരവര്‍ണങ്ങളില്‍ ആവിഷ്‌കരിക്കുന്നതെന്ന് ഇസൈ ഡയറക്ടര്‍ നിസാര്‍ മുഹമ്മദ് പറഞ്ഞു.പ്രദര്‍ശനവുമായി ബന്ധപ്പെട്ട് നടക്കുന്ന ചര്‍ച്ചയില്‍ പ്രമുഖ എഴുത്തുകാരും നിരൂപകരും പങ്കെടുക്കും.
ഒ.വി.വിജയന്റെ കൃതികള്‍, കാര്‍ട്ടൂണുകള്‍, നിരൂപണങ്ങള്‍ എന്നിവയും പ്രദര്‍ശിപ്പിക്കും. പ്രദര്‍ശനത്തോടൊപ്പം കാവ്യാലാപനം, ചലച്ചിത്ര പ്രദര്‍ശനം, നാടകാവിഷ്‌കാരം, സംഗീതനിശ, അനുസ്മരണങ്ങള്‍ എന്നിവയും ഉണ്ടായിരിക്കും. സലിം ബാബു ഒറ്റയ്ക്ക് നടത്തുന്നതും ഒ.വി.വിജയനുമായി ബന്ധപ്പെട്ടുള്ള സംസ്ഥാനത്തെ ആദ്യ ചിത്രപ്രദര്‍ശനവുമാണിത്.