ഫറോക്ക്: അന്തരിച്ച ഇ. അഹമ്മദിന് അവസാന മണിക്കൂറുകളില്‍ നേരിടേണ്ടിവന്നത് ചരിത്രത്തില്‍ കേട്ടുകേള്‍വിയില്ലാത്ത ദുരനുഭവമാണെന്ന് എം.കെ രാഘവന്‍ എം.പി. ബേപ്പൂര്‍ നിയോജക മണ്ഡലം മുസ്‌ലിം ലീഗ് സംഘടിപ്പിച്ച ഇ. അഹമ്മദ് ബഹുജന അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ലോകത്തിനു മുന്നില്‍ മതേതര ഇന്ത്യയുടെ പ്രതീകമായിരുന്നു ഇ. അഹമ്മദെന്നും അദ്ദേഹം പറഞ്ഞു. കേന്ദ്ര മന്ത്രി, എം.പി എന്നീ നിലകളില്‍ പ്രവര്‍ത്തിച്ചതിന് പുറമെ അന്താരാഷ്ട്ര വേദികളില്‍ നിരവധി തവണ ഇന്ത്യയെ പ്രതിനിധീകരിച്ച നേതാവായിരുന്നു. ദുര്‍ബല വിഭാഗങ്ങള്‍ക്കും മൂല്യങ്ങള്‍ക്കും വേണ്ടി നിലകൊണ്ട വ്യക്തികൂടിയായിരുന്നു അദ്ദേഹമെന്നും എം.പി കൂട്ടിച്ചേര്‍ത്തു.
ചടങ്ങില്‍ മുസ്‌ലിം ലീഗ് സംസ്ഥാന സെക്രട്ടറി എം.സി മായിന്‍ ഹാജി അനുസ്മരണ പ്രഭാഷണം നടത്തി. മണ്ഡലം മുസ്‌ലിം ലീഗ് വൈസ് പ്രസിഡന്റ് പി.സി അഹമ്മദ്കുട്ടി ഹാജി അധ്യക്ഷനായി. ട്രഷറര്‍ യു. പോക്കര്‍ അനുശോചന പ്രമേയം അവതരിപ്പിച്ചു. ജില്ലാ മുസ്‌ലിം ലീഗ് പ്രസിഡന്റ് ഉമര്‍ പാണ്ടികശാല, സി.എം.പി സംസ്ഥാന അസി. സെക്രട്ടറി സി.എന്‍ വിജയകൃഷ്ണന്‍, ബി.ജെ.പി പ്രതിനിധി നാരങ്ങയില്‍ ശശി, സി.പി.ഐ നേതാവ് പിലാക്കാട്ട് ഷണ്‍മുഖന്‍, സി.എം.പി നേതാവ് നാരായണന്‍കുട്ടി മാസ്റ്റര്‍, കെ.എ വിജയന്‍, കെ.കെ ആലിക്കുട്ടി, മുഹമ്മദ് കോയ ഹാജി ബേപ്പൂര്‍, എ. മൂസക്കോയ ഹാജി, കെ.എം ബഷീര്‍, പി.എ വാരിദ്, ഷാഫി ചാലിയം, എം. കുഞ്ഞാമുട്ടി, പി. ആസിഫ്, ശിഹാബ് നല്ലളം, കാസിം ചാലിയം, നസീഫ് ചെറുവണ്ണൂര്‍ സംസാരിച്ചു.