ന്യൂയോര്‍ക്ക്: ഗ്രാമി പുരസ്‌കാര വേദിയെ കീഴടങ്ങി അമേരിക്കന്‍ സംഗീതജ്ഞരായ ബ്രൂണോ മാഴ്‌സും കെന്‍ട്രിക് ലാമറും. ന്യൂയോര്‍ക്കിലെ മാഡിസണ്‍ സ്‌ക്വയര്‍ ഗാര്‍ഡനില്‍ നടന്ന 2018 ഗ്രാമി അവാര്‍ഡ് ചടങ്ങില്‍ ഇരുവരും ചേര്‍ന്ന് വാരിക്കൂട്ടിയത് പത്ത് പുരസ്‌കാരങ്ങളാണ്. സോങ് ഓഫ് ദ ഇയര്‍, ആല്‍ബം ഓഫ് ദ ഇയര്‍, റെക്കോര്‍ഡ് ഓഫ് ദ ഇയര്‍ തുടങ്ങിയ പുരസ്‌കാരങ്ങളാണ് ഗായകനും ഗാനരചയിതാവുമായ ബ്രൂണോ സ്വന്തമാക്കിയത്.
റാപ് സംഗീതജ്ഞനായ കെന്‍ട്രിക് ലാമറിന്റെ ഏറെ ആഘോഷിക്കപ്പെട്ട 'ഡാമ് 'നെ മറികടന്നായിരുന്നു ബ്രൂണോയുടെ '24കെ മാജിക് ' മികച്ച സംഗീത ആല്‍ബമായി തിരഞ്ഞെടുക്കപ്പെട്ടത്. '24കെ മാജിക് ' റെക്കോര്‍ഡ് ഓഫ് ദ ഇയറും സ്വന്തമാക്കി. 'ദാറ്റ് ഈസ് വാട്ട് ഐ ലൈക്ക് ' ആണ് മികച്ച ഗാനത്തിന് ബ്രൂണോയെ അര്‍ഹനാക്കിയത്.
കെന്‍ട്രിക് ലാമര്‍ മികച്ച റാപ് ആല്‍ബം, മ്യൂസിക് വിഡിയോ, റാപ് ഗാനം, റാപ് പെര്‍ഫോമന്‍സ് തുടങ്ങിയ പുരസ്‌കാരങ്ങള്‍ നേടി. കാനഡയിലെ അലെസ്സിയ കാര മികച്ച നവാഗത സംഗീതജ്ഞര്‍ക്കുള്ള ബെസ്റ്റ് ന്യൂ ആര്‍ടിസ്റ്റ് പുരസ്‌കാരം സ്വന്തമാക്കി.