മാഡ്രിഡ്: 400-ാം ഗോളുമായി റയല്‍മാഡ്രിഡിന്റെ ബി.ബി.സി ലംഘം. റയല്‍ മാഡ്രിഡ് താരങ്ങളായ ബെന്‍സേമ, ബെയില്‍, ക്രിസ്റ്റ്യാനോ അടങ്ങുന്ന ബി. ബി. സി സംഘമാണ് റയല്‍മാഡ്രിഡിന് വേണ്ടി 400 ഗോളുകള്‍ നേടിയത്. വലന്‍സിയക്കെതിരേയുള്ള മത്സരത്തിലാണ് മൂവര്‍ സംഘം മിന്നുന്ന നേട്ടം കൈവരിച്ചത്.
2013 മുതല്‍ റയല്‍ മാഡ്രിഡിനെ മൂന്ന് ചാംപ്യന്‍സ് ലീഗുകളില്‍ ചാംപ്യന്‍മാരാക്കുന്നതില്‍ ബി.ബി.സിയുടെ പങ്ക് നിര്‍ണായകമായിരുന്നു. 2009 മുതല്‍ ടീമിനൊപ്പമുള്ള ക്രിസ്റ്റ്യാനോയും ബെന്‍സേമയും മധ്യനിരയിലും മുന്നേറ്റ നിരയിലും മികച്ച കൂട്ടുകെട്ടായിരുന്നു.
എന്നാല്‍ 2013ന് ശേഷമാണ് ബെയില്‍ റയല്‍ മാഡ്രിഡിലെത്തുന്നത്. തുടര്‍ന്നാണ് ബി. ബി. സി സഖ്യം റയലിന്റെ മുന്നേറ്റ നിരയില്‍ നേട്ടങ്ങള്‍ കൊയ്യുന്നത്. പരുക്ക് കാരണം പുറത്തായിരുന്ന ബെയ്‌ലും ഫോമില്ലാത്തത് കാരണം ടീമിലില്ലാതിരുന്ന ബെന്‍സേമയും പത്ത് മാസങ്ങള്‍ക്ക് ശേഷമാണ് വീണ്ടും ഒന്നിക്കുന്നത്.
മസിലിനേറ്റ പരുക്ക് കാരണം ബെയിലിന് ഈ സീസണില്‍ വളരെ കുറച്ച് മത്സരം മാത്രമേ കളിക്കാനായിട്ടുള്ളു. ബി.ബി.സി നേടിയ 400 ഗോളില്‍ പകുതിയിലധിക ഗോളുകളും ക്രിസ്റ്റ്യാനോയുടെ വകയായിരുന്നു. 225 ഗോളുകളാണ് ക്രിസ്റ്റ്യാനോ നേടിയത്. ബെന്‍സേമ 99ഗോളും ബെയില്‍ 76 ഗോളും നേടിയാണ് 400 ഗോളെന്ന നേട്ടം കൈവരിച്ചത്. പരുക്ക് മാറി ടീമില്‍ തീരിച്ചെത്തിയ ബെയില്‍ കൂടി ആദ്യ ഇലവനില്‍ കളത്തിലിറങ്ങിയിയാല്‍ ബി. ബി. സി സംഘത്തിന്റെ തേര്‍വാഴ്ച ഇനിയും മൈതാനത്ത് കാണാനാകും.
പരുക്കേറ്റ് പുറത്ത് പോയ ബെയിലിന് പകരം ആരെ പരീക്ഷിച്ചിട്ടും ബെയിലിന് പകരമാവാത്തതില്‍ വിഷമത്തിലായിരുന്നു പരിശീലകന്‍ സിനദീന്‍ സിദാന്‍.
ബെയില്‍ ടീമില്‍ തിരിച്ചെത്തിയത് ടീമിന് പുത്തനുണര്‍വായെന്ന് വലന്‍സിയക്കെതിരേയുള്ള മത്സര ശേഷം പരിശീലകന്‍ സിനദീന്‍ സിദാന്‍ പറഞ്ഞു.