ബെര്‍ലിന്‍: ജര്‍മനിലെ സഖ്യസര്‍ക്കാരിനിടയില്‍ ഭിന്നിപ്പുണ്ടായ കുടിയേറ്റ വിഷയത്തില്‍ ധാരണയായി. കുടിയേറ്റക്കാരുടെ കുടുംബാംഗങ്ങളുടെ പുനസ്സമാഗമവുമായി ബന്ധപ്പെട്ടാണ് സര്‍ക്കാരിലെ സഖ്യകക്ഷികള്‍ക്കിടയില്‍ ഭിന്നതയുണ്ടായത്.
ചാന്‍സലര്‍ ആംഗെല മെര്‍ക്കലിന്റെ പാര്‍ട്ടിയുടെയും സോഷ്യല്‍ ഡെമോക്രാറ്റിക് പാര്‍ട്ടിയുടെയും ഇടയില്‍ നടന്ന ചര്‍ച്ചയിലാണു ധാരണയിലെത്തിയത്. ഇതോടെ നാലു മാസമായി തുടരുന്ന ജര്‍മനിയിലെ ഭരണപ്രതിസന്ധിക്കു പരിഹാരമായി.
സഖ്യകക്ഷികള്‍ക്കിടയിലെ ധാരണയനുസരിച്ച് കുടിയേറ്റക്കാരുടെ കുടുംബങ്ങളുടെ പുനസ്സമാഗമം തടയുന്ന നിയമം ജൂലൈ 31 വരെ തുടരും. 2016 മുതലാണ് ഈ നിയമം ആരംഭിച്ചത്. രാജ്യവിരുദ്ധ പ്രവര്‍ത്തനം, മനുഷിക വിരുദ്ധമായ ഇടപെടല്‍ തുടങ്ങിയ പ്രവൃത്തികള്‍ നടത്തുന്നവരെയാണു തടയുക.