അമ്പലപ്പുഴ: ആലപ്പുഴ വണ്ടാനം മെഡിക്കല്‍ കോളജില്‍ റാഗിങിനെത്തുടര്‍ന്ന് ഒന്നാം വര്‍ഷ എം.ബി.ബി.എസ് വിദ്യാര്‍ഥി അത്മഹത്യയ്ക്ക് ശ്രമിച്ച സംഭവത്തില്‍ രണ്ടുപേര്‍ക്ക് സസ്‌പെന്‍ഷന്‍. രണ്ടാം വര്‍ഷ എം.ബി.ബി.എസ് വിദ്യാര്‍ഥികളായ മന്‍സൂര്‍, അക്ഷയ് എന്നിവരെയാണ് സസ്‌പെന്‍ഡ് ചെയ്തത്.
തിരുവനന്തപുരം സ്വദേശിയായ ഒന്നാംവര്‍ഷ എം.ബി.ബി.എസ് വിദ്യാര്‍ഥിയെ രണ്ടാം വര്‍ഷ വിദ്യാര്‍ഥികളായ മന്‍സൂര്‍, അക്ഷയ് എന്നിവര്‍ ചേര്‍ന്ന് റാഗു ചെയ്യുകയായിരുന്നു. കഴിഞ്ഞ ദിവസം രാത്രിയായിരുന്നു സംഭവം. ഇതില്‍ മനംനൊന്ത വിദ്യാര്‍ഥി ആത്മഹത്യക്ക് ശ്രമിച്ചിരുന്നു. തുടര്‍ന്ന് മറ്റു വിദ്യാര്‍ഥികള്‍ റാഗിങിന് ഇരയായ വിദ്യാര്‍ഥിയുടെ മാതാവിനെ വിവരമറിയിച്ചു. ഇവര്‍ കോളജ് പ്രിന്‍സിപ്പലിനു നല്‍കിയ പരാതിയെ തുടര്‍ന്നാണ്് രണ്ടു വിദ്യാര്‍ഥികളെ സസ്‌പെന്‍ഡു ചെയ്തത്.
പ്രിന്‍സിപ്പല്‍ ഡോ. പുഷ്പലത നല്‍കിയ പരാതിയുടെ അടിസ്ഥാനത്തില്‍ പുന്നപ്ര പൊലിസ് അക്ഷയ്ക്കും മന്‍സൂറിനുമെതിരേ ജാമ്യമില്ലാ വകുപ്പ് പ്രകാരം കേസെടുത്തു. ഒളിവില്‍ പോയ പ്രതികള്‍ക്കുവേണ്ടി അന്വേഷണം ഊര്‍ജിതമാക്കിയതായി പുന്നപ്ര എസ് .ഐ ശ്രീജിത് പറഞ്ഞു.