പാലക്കാട്: ഫെബ്രുവരി ഒന്നിന് കേരളാ ഷോളയാര്‍ ഡാം നിറച്ചു നല്‍കണമെന്ന പറമ്പിക്കുളം-ആളിയാര്‍ കരാറിലെ വ്യവസ്ഥ തമിഴ്‌നാട് ഇത്തവണയും ലംഘിച്ചു. ഇന്നലെ വൈകിട്ട് വരെ കേരളാ ഷോളയാറില്‍ 2652.6 അടി വെള്ളം മാത്രമാണുള്ളത്.
2663 അടിയാണ് ഡാമിന്റെ പരമാവധി സംഭരണശേഷി. പൂര്‍ണമായി നിറയ്ക്കണമെങ്കില്‍ 11 അടി വെള്ളം കൂടി വേണം. കേരളാ ഷോളയാറില്‍ വെള്ളമെത്തിക്കുന്ന തങ്ങളുടെ അപ്പര്‍ ആളിയാര്‍ ഡാമില്‍ ഇപ്പോള്‍ ഒന്നര ടി.എം.സി വെള്ളം മാത്രമാണുള്ളതെന്നാണ് തമിഴ്‌നാട് ഇതിനായി പറയുന്ന വാദം. ഇതോടെ ഇത്തവണയും തൃശൂര്‍, എറണാകുളം ജില്ലകളില്‍ മെയ്മാസത്തില്‍ കുടിവെള്ളക്ഷാമം അതിരൂക്ഷമാവാനാണ് സാധ്യത. കഴിഞ്ഞ തവണയും കേരളാ ഷോളയാര്‍ ഡാം നിറച്ചിരുന്നില്ല.
കരാര്‍ പ്രകാരം ഡാം നിറയ്ക്കാത്തത് കേരളത്തിലെ വൈദ്യുതി ഉല്‍പ്പാദനത്തെയും ബാധിക്കും. ഈയിനത്തില്‍ മാത്രം കേരളത്തിന് 50കോടിയോളം രൂപയുടെ നഷ്ടമുണ്ടാവാനിടയുണ്ടെന്നാണ് കണക്കാക്കുന്നത്. എന്നാല്‍, തങ്ങളുടെ അപ്പര്‍ ഷോളയാര്‍ ഡാമിലെ വെള്ളം ഉപയോഗിച്ച് പ്രതിവര്‍ഷം 900 കോടി രൂപയുടെ വൈദ്യുതി തമിഴ്‌നാട് ഉല്‍പ്പാദിപ്പിക്കുന്നുണ്ടെന്നാണ് കണക്കുകള്‍ സൂചിപ്പിക്കുന്നത്.
അപ്പര്‍ ഷോളയാറിലെ രണ്ടാം നമ്പര്‍ പവര്‍ഹൗസില്‍നിന്ന് വൈദ്യുതി ഉല്‍പ്പാദിപ്പിച്ച ശേഷമാണ് തമിഴ്‌നാട് കേരളാ ഷോളയാറിലേക്ക് വെള്ളം തുറന്നു വിടുന്നത്. ഈ വെള്ളമാണ് കേരളാ ഷോളയാറിലും, പെരിങ്ങല്‍കുത്തിലും വൈദ്യുതി ഉല്‍പ്പാദിപ്പിക്കാന്‍ ഉപയോഗിക്കുന്നത്.
കേരളത്തിന് വെള്ളം തരാതിരിക്കാനായി അപ്പര്‍ ഷോളയാറിലെ ഒന്നാം നമ്പര്‍ പവര്‍ഹൗസില്‍നിന്ന് വൈദ്യുതി ഉല്‍പ്പാദിപ്പിച്ച ശേഷം പറമ്പിക്കുളം ഡാമിലേക്ക് വെള്ളം ഒഴുക്കുകയാണ് തമിഴ്‌നാട് ഇപ്പോള്‍ ചെയ്തുകൊണ്ടിരിക്കുന്നത്. പിന്നീട് സര്‍ക്കാര്‍പതി പവര്‍ഹൗസില്‍നിന്ന് 30 മെഗാവാട്ട് വൈദ്യുതി ഉല്‍പ്പാദിപ്പിച്ച ശേഷം കോണ്ടൂര്‍ കനാലിലൂടെ വെള്ളം തിരുമൂര്‍ത്തിഡാമിലെത്തിക്കും. അവിടെനിന്ന് കാവേരി തടത്തിലെ കോയമ്പത്തൂര്‍ ഉള്‍പ്പെടെയുള്ള 30,000 ഏക്കറിലേക്ക് വെള്ളമെത്തിച്ചുകൊടുക്കുകയുമാണ് ചെയ്യുന്നത്.
മഴയില്‍ കുറവുവന്നാല്‍ നല്‍കുന്ന വെള്ളത്തില്‍ 0.5 ടി.എം.സി കുറച്ചു നല്‍കിയാല്‍ മതിയെന്ന കേരളത്തിന്റെ 1991 ലെ നിലപാട് മറയാക്കിയാണ് തമിഴ്‌നാട് കരാര്‍ ലംഘനം തുടര്‍ന്നുവരുന്നത്. 1972 നു ശേഷം പലതവണ തമിഴ്‌നാട് ഷോളയാര്‍ ഡാം നിറയ്ക്കുന്നതില്‍ വീഴ്ച വരുത്തിയിട്ടുണ്ട്.
ഇതൊന്നും കണ്ടില്ലെന്നും കേട്ടില്ലെന്നും നടിക്കുന്ന കേരളത്തിന്റെ അലംഭാവം അവര്‍ പരമാവധി മുതലെടുക്കുകയാണിപ്പോള്‍. 1978-79, 93-94, 2002-03, 2016-17 വര്‍ഷങ്ങളിലും കേരളാ ഷോളയാറിലേക്ക് കിട്ടേണ്ട വെള്ളം മുഴുവന്‍ തമിഴ്‌നാട് നല്‍കിയിട്ടുമില്ല. കരാര്‍പ്രകാരം അപ്പര്‍ ഷോളയാര്‍ ഡാമില്‍നിന്ന് 12.3 ടി.എം.സി വെള്ളം ഒരു ജലവര്‍ഷം കേരളത്തിന് ലഭിക്കണം.
പെരിങ്ങല്‍കുത്ത് ഡാമില്‍ നിന്ന് വൈദ്യുതി ഉല്‍പ്പാദിപ്പിച്ച ശേഷം ചാലക്കുടി പുഴയിലേക്ക് തുറന്നുവിടുന്ന ഈ വെള്ളമാണ് തൃശൂര്‍ എറണാകുളം ജില്ലകളുടെ വലിയൊരു ഭാഗത്ത് കുടിവെള്ളത്തിനടക്കം ഉപയോഗപ്പെടുത്തുന്നത്.