പാരിസ്: യുവേഫ ചാംപ്യന്‍സ് ലീഗ് പ്രീ ക്വാര്‍ട്ടര്‍ പോരാട്ടത്തിന്റെ ആദ്യ പാദ മത്സരങ്ങള്‍ക്കു ഇന്നു തുടക്കം. മുന്‍ ചാംപ്യന്‍മാരായ ബാഴ്‌സലോണ ഫ്രഞ്ച് ലീഗ് വണ്‍ ചാംപ്യന്‍മാരായ പാരിസ് സെന്റ് ജെര്‍മെയ്‌നുമായും ജര്‍മന്‍ കരുത്തരായ ബൊറൂസിയ ഡോര്‍ട്മുണ്ട് പോര്‍ച്ചുഗല്‍ ക്ലബ് ബെന്‍ഫിക്കയുമായി ഏറ്റുമുട്ടും.
നാളെ നടക്കുന്ന പോരാട്ടങ്ങളില്‍ നിലവിലെ ചാംപ്യന്‍മാരായ റയല്‍ മാഡ്രഡ് ഇറ്റാലിയന്‍ കരുത്തര്‍ നാപോളിയുമായും മുന്‍ ചാംപ്യന്‍മാരായ ബയേണ്‍ മ്യൂണിക്ക് ഇംഗ്ലീഷ് കരുത്തരായ ആഴ്‌സണലുമായും ഏറ്റുമുട്ടും. മറ്റു ദിവസങ്ങളില്‍ ബയര്‍ ലെവര്‍കൂസന്‍- അത്‌ലറ്റിക്കോ മാഡ്രിഡുമായും മാഞ്ചസ്റ്റര്‍ സിറ്റി- മൊണാക്കോയുമായും പോര്‍ടോ- യുവന്റസുമായും സെവിയ്യ- ലെയ്സ്റ്റര്‍ സിറ്റിയുമായും ഏറ്റുമുട്ടും.
ഇന്നു മുതല്‍ ഈ മാസം 23 വരെയാണു പ്രീ ക്വാര്‍ട്ടര്‍ ആദ്യ പാദം അരങ്ങേറുക. രണ്ടാം പാദ പോരാട്ടങ്ങള്‍ മാര്‍ച്ച് എട്ടു മുതല്‍ 16 വരെ അരങ്ങേറും. പ്രീ ക്വാര്‍ട്ടറില്‍ കരുത്തുറ്റ എതിരാളികളെ ലഭിച്ച ടീമുകളാണു ബാഴ്‌സയും ബയേണ്‍ മ്യൂണിക്കും. ഇന്നു ബാഴ്‌സലോണ പി.എസ്.ജിയെ അവരുടെ തട്ടകത്തിലാണു നേരിടാനിറങ്ങുന്നത്.
ഇരു ടീമുകളും മികച്ച ഫോമില്‍ നില്‍ക്കുന്നതിനാല്‍ ഫലം മുന്‍കൂട്ടി പ്രവചിക്കുക അസാധ്യമാണ്. കഴിഞ്ഞ ദിവസം ആല്‍വെസിനെ ആറു ഗോളുകള്‍ക്ക് കീഴടക്കിയതിന്റെ മികച്ച ആത്മവിശ്വാസത്തിലാണു ബാഴ്‌സലോണ പാരിസിലേക്ക് വിമാനം കയറിയത്. ബോര്‍ഡെക്‌സിനെതിരേ വിജയം പിടിച്ചതിന്റെ ആത്മവിശ്വാസത്തിലാണ് പി.എസ്.ജി സ്വന്തം തട്ടകത്തില്‍ സ്പാനിഷ് കരുത്തരെ നേരിടാനിറങ്ങുന്നത്. അര്‍ജന്റീന ടീമില്‍ ഒരുമിച്ചു കളിക്കുന്ന ലയണല്‍ മെസ്സിയും എയ്ഞ്ചല്‍ ഡി മരിയയും നേര്‍ക്കുനേര്‍ വരുന്നതാണു ഇന്നത്തെ മത്സരത്തിന്റെ സവിശേഷത.
സമീപ കാലത്ത് നേര്‍ക്കുനേര്‍ വന്നപ്പോള്‍ ബാഴ്‌സലോണയാണു കൂടുതല്‍ വിജയിച്ചത്. അഞ്ചു തവണ ഏറ്റുമുട്ടിയതില്‍ ബാഴ്‌സലോണ മൂന്നു മത്സരങ്ങളില്‍ വിജയിച്ചു. പി.എസ്.ജി ഒരു പോരാട്ടം വിജയിച്ചപ്പോള്‍ ഒരു മത്സരം സമനിലയില്‍ പിരിഞ്ഞു.