മലപ്പുറം: രൂക്ഷമായ വരള്‍ച്ചയുടെ പശ്ചാത്തലത്തില്‍ തദ്ദേശ സ്വയംഭരണ സ്ഥാപനങ്ങള്‍ക്ക് തനതു ഫണ്ട് വിനിയോഗിച്ച് കുടിവെള്ള വിതരണം നടത്തുന്നതിനും കുടിവെള്ള സ്രോതസുകളുടെ റിപ്പയറിങ്ങിനും പ്രത്യേക അനുമതി. കിണറുകള്‍, കുഴല്‍ക്കിണറുകള്‍, ചെറുകിട കുടിവെള്ള പദ്ധതികള്‍ തുടങ്ങിയവ റിപ്പയര്‍ ചെയ്യുന്നതിനും ടാങ്കര്‍ ലോറികളിലും മറ്റും കുടിവെള്ള വിതരണം നടത്തുന്നതിനും പഞ്ചായത്തുകള്‍ക്ക് സ്വന്തം ഫണ്ട് ചെലവഴിക്കാന്‍ അനുമതി നല്‍കുന്ന കാര്യമാണ് പരിഗണിച്ചത്.
ഇന്നലെ മലപ്പുറത്തു മന്ത്രി ഡോ. കെ.ടി ജലീലിന്റെ അധ്യക്ഷതയില്‍ ചേര്‍ന്ന വരള്‍ച്ചാ അവലോകന യോഗത്തില്‍ ഇതുസംബന്ധിച്ച കര്‍മപദ്ധതികള്‍ അവതരിപ്പിച്ചു. പഞ്ചായതത്തുകളുടെ തനത് ഫണ്ട് വിനിയോഗ കാര്യത്തില്‍ നാളെ ചേരുന്ന സംസ്ഥാനതല കോഡിനേഷന്‍ കമ്മിറ്റിയില്‍ തീരുമാനമെടുക്കുമെന്നു മന്ത്രി പറഞ്ഞു. ജില്ലാ കലക്ടറുടെ വരള്‍ച്ചാ ദുരിതാശ്വസ ഫണ്ടിലേക്കു ലഭിക്കുന്ന തുക മുഴുവന്‍ പഞ്ചായത്തുകള്‍ക്കും വീതിച്ചുനല്‍കും. ജില്ലാതലത്തില്‍ കേന്ദ്രീകൃതമായി ഫണ്ട് വിനിയോഗിക്കുന്നതിനെക്കാള്‍ തദ്ദേശ സ്ഥാപനങ്ങള്‍ വഴി ചെലവഴിക്കുന്നതാണെന്ന് ഫലപ്രദമെന്നും യോഗം വിലയിരുത്തി. കുടിവെള്ള ക്ഷാമം രൂക്ഷമായ പഞ്ചായത്തുകള്‍ക്ക് കൂടുതല്‍ തുക നല്‍കും. ആദ്യഘട്ടമായി ലഭിച്ച 50 ലക്ഷം രൂപ പഞ്ചായത്തുകള്‍ക്ക് വിതരണം ചെയ്യും.
പണി പൂര്‍ത്തിയാകാത്തതിനാല്‍ കെട്ടിക്കിടക്കുന്ന ജല അതോറിറ്റിയുടെ ജലസംഭരണികളില്‍ നിന്ന് പഞ്ചായത്തുകള്‍ക്ക വെള്ളം വിതരണം ചെയ്യാന്‍ അനുമതിനല്‍കുന്നതും പരിഗണിക്കും.
ഭാഗികമായി പൂര്‍ത്തീകരിച്ച കുടിവെള്ള പദ്ധതികളില്‍ സാധ്യമായത്ര പേര്‍ക്ക് കണക്ഷന്‍ എളുപ്പത്തില്‍ നല്‍കാന്‍ ജല അതോറിറ്റിക്ക് നിര്‍ദേശം നല്‍കി. വൈദ്യുതി കണക്ഷനില്ലാത്തതിനാല്‍ മുടങ്ങിയവയ്ക്ക് കണക്ഷന്‍ നല്‍കണം.
കലക്ടറേറ്റ് സമ്മേളന ഹാളില്‍ ചേര്‍ന്ന യോഗത്തില്‍ പി. ഉബൈദുല്ല എം.എല്‍.എ, ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, അംഗം എം.ബി ഫൈസല്‍, പഞ്ചായത്ത് അസോസിയേഷന്‍ പ്രസിഡന്റ് എ.കെ നാസര്‍, ജില്ലാ കലക്ടറുടെ ചുമതലയുള്ള എ.ഡി.എം പി. സെയ്യിദലി, സബ് കലക്ടര്‍ ജാഫര്‍ മാലിക്, ദുരന്ത നിവാരണ വിഭാഗം ഡെപ്യൂട്ടി കലക്ടര്‍ സി. അബ്ദുറഷീദ് പങ്കെടുത്തു.