കൊച്ചി: യുവതിയായി നടിച്ച് വിവാഹ വാഗ്ദാനം നൽകി 33 ലക്ഷം രൂപ തട്ടിയെടുത്ത മധ്യവയസ്കനെ ഞാറയ്ക്കൽ പൊലീസ് അറസ്റ്റ് ചെയ്തു. മലപ്പുറം വേങ്ങര വൈദ്യർവീട്ടിൽ മുജീബ് റഹ്മാൻ (45) ആണ് അറസ്റ്റിലായത്. എടവനക്കാട് സ്വദേശിയായ പരാതിക്കാരനോട് ഇയാൾ വിവാഹ വാഗ്ദാനം നൽകിയ ശേഷം ക്രിപ്റ്റോ കറൻസി ട്രേഡിംഗിൽ ലാഭം ഉണ്ടാകുമെന്ന് വിശ്വസിപ്പിച്ച് പണം തട്ടിയെടുക്കുകയായിരുന്നു.

മാട്രിമോണിയൽ പരസ്യം വഴി പരാതിക്കാരന് ഫോൺ നമ്പർ ലഭിച്ചതിന് പിന്നാലെ വാട്സാപ്പ് വഴി പ്രതി ബന്ധപ്പെടുകയായിരുന്നു. തന്റെ പേര് ശ്രുതി ആണെന്നും ബംഗളൂരുവിൽ സ്ഥിരതാമസമാണെന്നും ബ്രിട്ടനിൽ ജോലിചെയ്യുന്നുവെന്നും പറഞ്ഞ് വിശ്വാസം നേടുകയായിരുന്നു.
വിവാഹ വാഗ്ദാനത്തിനൊപ്പം ഓൺലൈൻ കറൻസി ട്രേഡിംഗിൽ ലാഭം ഉണ്ടാകുമെന്ന് പറഞ്ഞ് യുവാവിനെക്കൊണ്ട് ചില ആപ്പുകൾ ഡൗൺലോഡ് ചെയ്യിച്ചു. തുടക്കത്തിൽ 7,44,000 രൂപക്ക് ക്രിപ്റ്റോ കറൻസി വാങ്ങിച്ച് മറ്റൊരു ആപ്പിൽ നിക്ഷേപിക്കാൻ ആവശ്യപ്പെട്ടു. ഇതിന് ശേഷം പല തവണയായി മൊത്തം 32,93,306 രൂപ യുവാവിന്റെ അക്കൗണ്ടിൽ നിന്ന് കൈയേറ്റം ചെയ്‌തതായി പൊലീസ് അറിയിച്ചു.

2023 ഒക്ടോബറിലാണ് ഈ തട്ടിപ്പ് നടന്നത്. പരാതിയുടെ അടിസ്ഥാനത്തിൽ അന്വേഷണം നടത്തിയപ്പോഴാണ് പ്രതിയെ കണ്ടെത്തിയത്. പിടിയിലായ മുജീബ് റഹ്മാനെ കോടതിയിൽ ഹാജരാക്കി റിമാൻഡ് ചെയ്തു.