ഇരിങ്ങാലക്കുട: സഹോദരിയെ കളിയാക്കിയത് ചോദ്യംചെയ്ത സുജിത്തിനെ തലയ്ക്കടിച്ച് കൊലപ്പെടുത്തിയ സംഭവത്തില്‍ പ്രതി മിഥുന്‍ ആത്മഹത്യക്ക് ശ്രമിച്ചു. സംഭവത്തിനുശേഷം ഒളിവിലായിരുന്ന മിഥുന്‍ കഴിഞ്ഞ ദിവസമാണ് അത്മഹത്യക്കു ശ്രമിച്ചത്.
പ്രതിയെ പിടിക്കുന്നതിനായി ലുക്ക്ഔട്ട് നോട്ടിസടക്കം പുറത്തിറക്കി വ്യാപക തിരച്ചില്‍ നടത്തുന്നതിനിടെയാണ് സംഭവം. ശനിയാഴ്ച പുലര്‍ച്ചേ 1.30തോടെ ഫേസ്ബുക്ക് ഓണ്‍ലൈനില്‍ വന്ന മിഥുനോട് സുഹൃത്ത് നിനക്ക് നീയമത്തിന് കീഴടങ്ങിക്കൂടെ എന്ന ചോദ്യത്തിന് ആദ്യമായിട്ടാണ് ഒരാളെ അടിക്കുന്നതെന്നും ജീവിതം ഇനി ശവത്തിന് തുല്യമാണെന്നും മിഥുന്‍ മറുപടി നല്‍കിയിരുന്നു.
അതിനുശേഷമാണ് മിഥുന്‍ പെണ്‍കുട്ടിയുടെ സഹോദരന് ആത്മഹത്യ കുറിപ്പ് വാട്‌സ്ആപ്പില്‍ പുലര്‍ച്ചെ അയച്ചത്. തുടര്‍ന്ന് രാത്രിയോടെ എടക്കുളം ഐക്കരകുന്നുള്ള സുജിത്തിന്റെ ഇളയച്ഛന്റെ വീടിന് പിറകിലായി കൈയിലെ ഞരമ്പ് മുറിച്ച് ആത്മഹത്യയ്ക്ക് ശ്രമിക്കുകയായിരുന്നു. രാവിലെയാണ് സംഭവം വീട്ടുകാരുടെ ശ്രദ്ധയില്‍പെട്ടത്. തുടര്‍ന്ന് പൊലിസെത്തി ഇരിങ്ങാലക്കുടയിലെ സഹകരണ ആശുപത്രിയില്‍ പ്രവേശിപ്പിച്ചു. ഇവിടെ നിന്ന് തുടര്‍ചികിത്സക്കായി തൃശൂര്‍ ജൂബിലി ആശുപത്രിയിലേക്ക് പ്രതിയെ മാറ്റി.