സന്‍ആ: യമനിലെ അറബ് ജനകീയ പ്രക്ഷോഭത്തിന്റെ മുന്‍നിര പോരാളിയായിരുന്ന നൊബേല്‍ ജേതാവ് തവക്കുല്‍ കര്‍മാനെ പാര്‍ട്ടി പുറത്താക്കി. യമന്‍ പ്രസിഡന്റ് അബ്ദുറബ് മന്‍സൂര്‍ ഹാദിയുമായി സഖ്യത്തിലുള്ള ഇസ്‌ലാഹ് പാര്‍ട്ടിയാണ് അച്ചടക്കലംഘനം ആരോപിച്ചത് നടപടി സ്വീകരിച്ചത്.
മന്‍സൂര്‍ ഹാദിയുടെ സര്‍ക്കാര്‍ സൈന്യത്തെ പിന്തുണക്കുന്ന സഊദി സഖ്യസേനയെ അധിനിവേശകര്‍ എന്നു പരിചയപ്പെടുത്തിയതിനാണു നടപടി. മുസ്‌ലിം ബ്രദര്‍ഹുഡിന്റെ യമന്‍ ഘടകമാണ് ഇസ്‌ലാഹ് പാര്‍ട്ടി. യമനിനെ വിഭജിക്കാനാണ് സഊദിയും യു.എ.ഇയും ചേര്‍ന്ന് രാജ്യത്ത് സൈനിക നടപടി നടത്തുന്നതെന്നും നേരത്തെ കര്‍മാന്‍ വിമര്‍ശനമുന്നയിച്ചിരുന്നു.
2011ലെ അറബ് വസന്തത്തോടെയാണ് തവക്കുല്‍ കര്‍മാന്‍ ലോകശ്രദ്ധയാകര്‍ഷിച്ചത്. മുന്‍ പ്രസിഡന്റ് അലി അബ്ദുല്ലയെ സ്ഥാനത്തുനിന്ന് താഴെയിറക്കിയ ജനകീയ പ്രക്ഷോഭത്തില്‍ വഹിച്ച നേതൃപരമായ പങ്ക് പരിഗണിച്ചാണ് നൊബേല്‍ സമിതി സമാധാന പുരസ്‌കാരം നല്‍കി കര്‍മാനെ ആദരിച്ചത്.