മനാമ: ലഹരിവിപണിക്കെതിരെ ശക്തമായ നടപടി തുടരുന്നതിനിടെ ബഹ്‌റൈന്‍ സുരക്ഷാസേന നടത്തിയ രണ്ട് വ്യത്യസ്ത റെയ്ഡുകളില്‍ അഞ്ചുകിലോഗ്രാമിലധികം മയക്കുമരുന്ന് പിടികൂടി. സംഭവവുമായി ബന്ധപ്പെട്ട് രണ്ട് ഏഷ്യന്‍ പൗരന്മാരെ അറസ്റ്റ് ചെയ്തതായി മിനിസ്ട്രി ഓഫി ഇന്റീരിയര്‍ അറിയിച്ചു.

രഹസ്യാന്വേഷണ വിവരങ്ങളുടെ അടിസ്ഥാനത്തില്‍ ആസൂത്രണം ചെയ്ത പ്രത്യേക ഓപ്പറേഷനുകളിലൂടെയാണ് പ്രതികളെ പിടികൂടിയത്. 21 വയസ്സും 36 വയസ്സും പ്രായമുള്ളവരാണ് അറസ്റ്റിലായത്. ഇവരുടെ കൈവശം വിവിധ തരത്തിലുള്ള ലഹരിവസ്തുക്കളും മാനസികപ്രേരക മരുന്നുകളും കണ്ടെത്തിയതായി അധികൃതര്‍ വ്യക്തമാക്കി. പിടിച്ചെടുത്ത മയക്കുമരുന്നുകളുടെ ആകെ ഭാരം അഞ്ചുകിലോഗ്രാമില്‍ കൂടുതലാണെന്നും പ്രാഥമിക കണക്കെടുപ്പില്‍ വിപണി വില 61,000 ബഹ്‌റൈന്‍ ദിനാറില്‍ കൂടുതലായിരിക്കാമെന്നുമാണ് വിലയിരുത്തല്‍.

രാജ്യത്ത് ലഹരി ശൃംഖലകള്‍ ശക്തിപ്പെടുന്നത് തടയാന്‍ സുരക്ഷാസേന ശക്തമായ നിരീക്ഷണവും രഹസ്യ ഓപ്പറേഷനുകളും തുടരുകയാണെന്ന് ആഭ്യന്തര മന്ത്രാലയം അറിയിച്ചു. ലഹരിവസ്തുക്കളുടെ കടത്ത്, വിതരണ ശൃംഖലകള്‍, ഉപഭോക്തൃ വലയങ്ങള്‍ എന്നിവയെ ലക്ഷ്യമിട്ട് വ്യാപകമായ അന്വേഷണമാണ് പുരോഗമിക്കുന്നത്. യുവാക്കളെ ലക്ഷ്യമിട്ട് പ്രവര്‍ത്തിക്കുന്ന ലഹരി സംഘങ്ങളെ കണ്ടെത്തി നിയമത്തിന് മുന്നിലെത്തിക്കുന്നതില്‍ വിട്ടുവീഴ്ചയില്ലെന്നും അധികൃതര്‍ മുന്നറിയിപ്പ് നല്‍കി.

ലഹരി വ്യാപനം സമൂഹത്തിനും കുടുംബങ്ങള്‍ക്കും സാരമായ ഭീഷണിയാണെന്ന് മന്ത്രാലയം ഓര്‍മ്മിപ്പിച്ചു. വിദ്യാഭ്യാസ സ്ഥാപനങ്ങള്‍ക്കും പൊതുസമൂഹത്തിനും മുന്നറിയിപ്പ് നല്‍കുന്ന ബോധവല്‍ക്കരണ പരിപാടികളും ശക്തിപ്പെടുത്തിയിട്ടുണ്ടെന്ന് അവര്‍ അറിയിച്ചു. ലഹരി സംബന്ധമായ വിവരങ്ങള്‍ അധികൃതരെ അറിയിക്കാന്‍ പൊതുജനങ്ങളുടെ സഹകരണവും അഭ്യര്‍ത്ഥിച്ചിട്ടുണ്ട്. 

അറസ്റ്റിലായ പ്രതികളെ തുടര്‍ നിയമനടപടികള്‍ക്കായി പബ്ലിക് പ്രോസിക്യൂഷന് കൈമാറിയതായി അധികൃതര്‍ അറിയിച്ചു. രാജ്യത്തിന്റെ സുരക്ഷയും യുവതലമുറയുടെ ഭാവിയും സംരക്ഷിക്കാന്‍ ലഹരി വിരുദ്ധ പ്രവര്‍ത്തനങ്ങള്‍ കൂടുതല്‍ ശക്തമായി തുടരുമെന്നു മന്ത്രാലയം വ്യക്തമാക്കി.

Bahrain authorities seized over five kilograms of narcotics in two separate raids, arresting two Asian nationals. The Ministry of Interior confirmed the drugs are valued at more than BHD 61,000.