കാണ്‍പൂര്‍: അണ്ടര്‍ 23 ഏകദിന പോരാട്ടത്തില്‍ കേരളം അപരാജിത മുന്നേറ്റം തുടരുന്നു. പ്രീ ക്വാര്‍ട്ടര്‍ പോരാട്ടത്തില്‍ ബിഹാറിനെ 116 റണ്‍സിന് കീഴടക്കി കേരളം ക്വാര്‍ട്ടറിലേക്ക് മുന്നേറി. ആദ്യം ബാറ്റ് ചെയ്ത കേരളം നിശ്ചിത 50 ഓവറില്‍ അഞ്ച് വിക്കറ്റ് നഷ്ടത്തില്‍ 281 റണ്‍സെടുത്തപ്പോള്‍ ബിഹാറിന്റെ പോരാട്ടം 45.1 ഓവറില്‍ 165 റണ്‍സില്‍ അവാസാനിപ്പിച്ചാണ് കേരളം വിജയം പിടിച്ചെടുത്തത്.
142 പന്തുകള്‍ നേരിട്ട് 12 ഫോറിന്റെ അകമ്പടിയില്‍ 147 റണ്‍സ് അടിച്ചെടുത്ത് പുറത്താകാതെ നിന്ന ഓപണര്‍ രോഹന്‍ എസ് കുന്നുമ്മലിന്റെ കിടയറ്റ ബാറ്റിങ് പിന്‍ബലത്തിലാണ് കേരളം മികച്ച സ്‌കോര്‍ സ്വന്തമാക്കിയത്. അമ്മര്‍ സീഷന്‍ (45) രോഹനെ പിന്തുണച്ചു. വിജയം തേടിയിറങ്ങിയ ബിഹാറിനെ നാല് വിക്കറ്റെടുത്ത ശ്രീഹരി എസ് നായര്‍, മൂന്ന് വിക്കറ്റെടുത്ത ബേസില്‍ എന്‍.പി, രണ്ട് വിക്കറ്റെടുത്ത ഡാരിയല്‍ എസ് ഫെരാരിയോ എന്നിവരുടെ മികച്ച ബൗളിങിന്റെ പിന്‍ബലത്തിലാണ് കേരളം വീഴ്ത്തിയത്. 34 റണ്‍സെടുത്ത ഉത്കര്‍ഷ്, 32 റണ്‍സെടുത്ത നിതിന്‍ കുമാര്‍ എന്നിവര്‍ മാത്രമാണ് ബിഹാര്‍ നിരയില്‍ ഭേദപ്പെട്ട പ്രകടനം പുറത്തെടുത്തത്.