പൊന്നാനി: ഇന്റര്‍ യൂണിവേഴ്‌സിറ്റി വെയ്റ്റ് ലിഫ്റ്റിങ് മത്സരത്തില്‍ സുവര്‍ണ നേട്ടം കൊയ്ത് പൊന്നാനി കടവനാട് സ്വദേശി ചെമ്പ്ര കൃഷ്ണകുമാര്‍.
ഇന്ത്യയിലെ മുഴുവന്‍ സര്‍വകലാശാലയില്‍ നിന്നുമുള്ള ചാംപ്യന്മാരും മാറ്റുരച്ച വെയ്റ്റ് ലിഫ്റ്റിങ് മത്സരത്തില്‍ വ്യക്തിഗത ചാംപ്യനായാണ് കൃഷ്ണകുമാര്‍ നാടിന്റെ അഭിമാനമായത്. 105 കിലോ വിഭാഗത്തിലാണ് കൃഷ്ണകുമാര്‍ സ്വര്‍ണം നേടിയത്. 2010 മുതല്‍ വെയ്റ്റ് ലിഫ്റ്റിങ്ങില്‍ മത്സരിക്കുന്ന കൃഷ്ണകുമാര്‍ നിരവധി തവണ വ്യക്തിഗത ചാംപ്യനായിട്ടുണ്ട്. തൃശൂര്‍ കേരളവര്‍മ്മ കോളജിലെ ഇംഗ്ലിഷ് പി ജി വിദ്യാര്‍ഥിയാണ് കൃഷ്ണകുമാര്‍. കേരള വെയ്റ്റ് ലിഫ്റ്റിങ്ങ് സ്‌പോര്‍ട്‌സ് കൗണ്‍സിലിലാണ് കൃഷ്ണകുമാര്‍ ഇപ്പോള്‍ പരിശീലനം നടത്തുന്നത്. ഓള്‍ ഇന്ത്യാ വെയ്റ്റ് ലിഫ്റ്റിങ്ങ് ചാംപ്യന്‍ഷിപ്പിലെ കഴിഞ്ഞ വര്‍ഷത്തെ വെള്ളിമെഡല്‍ ജേതാവാണ് കൃഷ്ണകുമാര്‍.