ചീമേനി: പോത്താങ്കണ്ടം അത്തൂട്ടി റോഡില്‍ ചീമേനി തുറന്ന ജയില്‍ വളപ്പില്‍ അഗ്നിബാധ. ഇന്നലെ വൈകിട്ട് അഞ്ചോടെയാണു ജയില്‍ വളപ്പില്‍ തീ പടര്‍ന്നത്. ജയില്‍ ഉദ്യോഗസ്ഥരും തടവുകാരും ഏറെ കഷ്ടപ്പെട്ടാണ് ജയിലില്‍ നിന്നു കൊണ്ടു വന്ന കുടിവെള്ളവും പച്ചക്കമ്പുകളുമുപയോഗിച്ചു തീയുടെ തീവ്രത കുറച്ചത്. തൃക്കരിപ്പൂരില്‍ നിന്ന് അഗ്നിശമന സേനയത്തി തീ മുഴുവനായും അണച്ചു.
350 ഹെക്ടറോളം വരുന്ന ജയില്‍ വളപ്പില്‍ നിറയെ കശുമാവുകളും ഉണക്കപ്പുല്ലും നിറഞ്ഞ പ്രദേശമാണ്.
ഉദ്യോഗസ്ഥരുടെയും തടവുകാരുടെയും നാട്ടുകാരുടെയും അവസരോചിതമായ ഇടപെടല്‍ കാരണം വന്‍ ദുരന്തമാണ് ഒഴിവായത്. നാലു ദിവസം മുന്‍പു ഇതിനു സമീപത്തു തീ പിടിച്ചിരുന്നു. അന്ന് അഗ്നിശമനാ സേനയെത്തുന്നതിനു മുന്‍പു തന്നെ നാട്ടുകാര്‍ തീയണച്ചു. കഴിഞ്ഞ ഒരു മാസത്തിനിടയില്‍ റോഡിനപ്പുറത്ത് ലാല്‍പാറ, വെളിച്ചംതോട്, കിഴക്കേനി, തുടങ്ങിയ പ്രദേശത്ത് അഞ്ചോളം തീപിടിത്തമാണുണ്ടായിട്ടുള്ളത്. ഇതില്‍ വലിയ തോതില്‍ കശുമാവുകള്‍ നശിച്ചിരുന്നു. ലക്ഷങ്ങളുടെ നഷ്ടമാണ് ഓരോ തീപിടിത്തത്തിലുമുണ്ടാക്കുന്നത്. സ്ഥിരമായി പ്രദേശത്തുണ്ടാകുന്ന തീ പിടിത്തം സാമൂഹ്യദ്രോഹികള്‍ മനഃപ്പൂര്‍വം ചെയ്യുന്നതാണെന്ന ആക്ഷേപമുണ്ട്.