നദുവന്‍: കേരളം- ബംഗാള്‍ വിജയ് ഹസാരെ ട്രോഫി ഏകദിന ക്രിക്കറ്റിലെ ആദ്യ പോരാട്ടം സമനിലയില്‍ അവസാനിച്ചു. ആദ്യം ബാറ്റ് ചെയ്ത കേരളം നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 235 റണ്‍സെടുത്തപ്പോള്‍ ബംഗാള്‍ 50 ഓവറില്‍ എട്ട് വിക്കറ്റ് നഷ്ടത്തില്‍ 235 റണ്‍സ് തന്നെ കണ്ടെത്തിയതോടെയാണ് മത്സരം ഒപ്പത്തിനൊപ്പം പിരിഞ്ഞത്.
ബംഗാള്‍ നായകന്‍ മനോജ് തിവാരി പുറത്താകാതെ നേടിയ 73 റണ്‍സാണ് മത്സരം തോല്‍ക്കാതെ ടീമിനെ സമനിലയിലെത്തിച്ചത്. അവസാന പന്തില്‍ വിജയ റണ്‍സ് ഓടാന്‍ ശ്രമിക്കുന്നതിനിടെ കനിഷ്‌ക് സേത്തിനെ അരുണ്‍ കാര്‍ത്തിക് റണ്ണൗട്ടാക്കുകയായിരുന്നു. കേരളത്തിനായി സന്ദീപ് വാര്യര്‍, കെ.സി അക്ഷയ്, അഭിഷേക് മോഹന്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.
നേരത്തെ ടോസ് നേടി കേരളം ബാറ്റിങ് തിരഞ്ഞെടുത്തു. ജലജ് സക്‌സേന പുറത്താകാതെ നേടിയ സെഞ്ച്വറി (100) കരുത്തിലാണ് കേരളം പൊരുതാവുന്ന സ്‌കോര്‍ സ്വന്തമാക്കിയത്. സഞ്ജു സാംസണ്‍ (34), മുഹമ്മദ് അസ്ഹറുദ്ദീന്‍ (28), വിഷ്ണു വിനോദ് (25) എന്നിവരും ഭേദപ്പെട്ട പ്രകടനം നടത്തി. മത്സരം സമനിലയില്‍ അവസാനിച്ചതോടെ കേരളവും ബംഗാളും രണ്ട് വീതം പോയിന്റുകള്‍ പങ്കിട്ടു.