മാനന്തവാടി: സമരങ്ങളും ഉപരോധങ്ങളും ആശുപത്രിയുടെ പ്രവര്‍ത്തനങ്ങളെ ബാധിക്കാറുണ്ട്. എന്നാല്‍ പക്ഷികള്‍ ആശുപത്രിയുടെ പ്രവര്‍ത്തനം താളം തെറ്റിച്ചാലോ..? കൗതുകം നിറഞ്ഞ അത്തരമൊരു സംഭവത്തിനാണ് മാനന്തവാടി ജില്ലാ ആശുപത്രി കഴിഞ്ഞ ദിവസം വേദിയായത്. ജില്ലാ ആശുപത്രിയിലെ ഓപറേഷന്‍ തീയേറ്ററുള്‍പ്പെടുന്ന കെട്ടിടത്തില്‍ കൂടുകൂട്ടിയ പ്രാവുകളാണ് ആശുപത്രിയിലെ ഓപ്പറേഷന്‍ ഉള്‍പെടെ തടസ്സപ്പെടുത്തുന്നത്. 

ഓപറേഷന്‍ തീയേറ്ററുള്‍പ്പെടുന്ന കെട്ടിടത്തിന്റെ സീലിങിന് മുകളില്‍ പ്രാവുകളുടെയും മറ്റും ശല്യം രൂക്ഷമായതോടെ അണുബാധയുണ്ടാകാനുള്ള സാധ്യത മുന്‍നിര്‍ത്തിയാണ് ശസ്ത്രക്രിയകള്‍ നിര്‍ത്തിവച്ചത്. പുതിയ കെട്ടിടത്തിന്റെ സീലിങിനിടയിലുള്ള വിടവിലൂടെയാണ് പ്രാവുകളും എലികളും കയറുകയും അതീവ ശുചിത്വ മേഖലയായ ഓപറേഷന്‍ തീയേറ്ററടക്കം മലിനപ്പെടുത്തുകയും ചെയ്തത്.
കെട്ടിടത്തോടനുബന്ധിച്ചുള്ള സീലിങ് സ്ഥാപിക്കുന്നതിലെ പിഴവുകളാണ് ഈ അവസ്ഥക്ക് കാരണമാക്കിയത്. സംഭവം ശ്രദ്ധയില്‍പ്പെട്ട ആരോഗ്യവകുപ്പ് അധികൃതര്‍ കെട്ടിട നിര്‍മാതാക്കളായ ജില്ലാ നിര്‍മിതി കേന്ദ്രം അധികൃതരെ വിവരം അറിയിച്ചിട്ടുണ്ട്. രണ്ട് ദിവസത്തിനുള്ളില്‍ പ്രശ്‌നം പരിഹരിക്കുമെന്ന് നിര്‍മിതി കേന്ദ്രം അധികൃതര്‍ ഉറപ്പ് നല്‍കിയിട്ടുണ്ട്.
നേത്രരോഗം, അസ്ഥിരോഗം, ഉദരസംബന്ധമായ രോഗം തുടങ്ങിയവയ്ക്കുള്ള ശസ്ത്രക്രിയകളാണ് പ്രധാനമായും ഈ സര്‍ജിക്കല്‍ കോംപ്ലക്‌സില്‍ നടക്കുന്നത്. എന്നാല്‍ സിസേറിയനും മറ്റും ഇവിടയല്ല നടത്തുന്നത്.
പ്രസവ വാര്‍ഡിലെ ഓപറേഷന്‍ തീയേറ്ററിന് മുകളിലും സീലിങിലെ പിഴവുകള്‍ കാരണം സമാന ഭീഷണി നേരിടുന്നുണ്ട്. നാളെയും മറ്റന്നാളുമായി അറ്റകുറ്റപണികള്‍ ചെയ്ത് സീലിങിലെ പിഴവുകള്‍ മാറ്റാമെന്നാണ് നിര്‍മിതി കേന്ദ്രം അധികൃതര്‍ പറഞ്ഞിരിക്കുന്നത്. അറ്റകുറ്റപണികള്‍ക്ക് ശേഷം ഒരുദിവസം ശുചീകരണത്തിനായും വേണ്ടിവരും.
അങ്ങനെയെങ്കില്‍ ശനിയാഴ്ച മുതല്‍ മാത്രമേ ജില്ലാ ആശുപത്രിയിലെ ഓപറേഷന്‍ തീയേറ്റര്‍ പ്രവര്‍ത്തന സജ്ജമാകുകയുള്ളു.