തലയോലപറമ്പ്: വീട് നിര്‍മാണത്തിനെന്ന പേരില്‍ അനധികൃതമായി മണ്ണെടുക്കകുയായിരുന്ന ജെസിബി പൊലീസ് കസ്റ്റഡിയിലെടുത്തു. മാന്നാര്‍ കുരക്കാല സി.എസ്.ഐ പള്ളിക്ക് സമീപം ഇന്നലെ ഉച്ചയോടെയാണ് സംഭവം. സ്വകാര്യ വ്യക്തി വീട് നിര്‍മിക്കുന്നതിന് മണ്ണ് നീക്കം ചെയ്യാന്‍ അനുമതി വാങ്ങിയിരുന്നു. തുടര്‍ന്ന് മണ്ണ് നീക്കം ചെയ്യുകയും തറ കെട്ടുകയും ചെയ്തിരുന്നു. പിന്നീട് ഇതേ അനുമതിയുടെ മറവില്‍ ഇന്നലെ മണ്ണെടുപ്പ് നടക്കുമ്പോളാണ് ജെസിബി പിടിച്ചെടുത്തത്. ദിവസങ്ങളായി ടിപ്പര്‍ ലോറികളില്‍ ഇവിടെ നിന്നും അനധികൃതമായി മണ്ണെടുപ്പ് നടന്നു വരികയായിരുന്നു. നാട്ടുകാരുടെ പരാതിയെ തുടര്‍ന്നാണ് പൊലിസിന്റെ നടപടി. പിടിച്ചെടുത്ത ജെസിബി സംബന്ധിച്ചു ജില്ലാ കലക്ടര്‍ക്ക് റിപ്പോര്‍ട്ട് നല്‍കുമെന്ന് എസ്‌ഐ ജെ.രാജീവ് അറിയിച്ചു.