കോഴിക്കോട്: ഫാസിസം സാധാരണജനങ്ങളെ അടിച്ചമര്‍ത്താന്‍ ശ്രമിക്കുകയാണെന്ന് ജെ.എന്‍.യു സമരനേതാവ് കനയ്യകുമാര്‍. കോഴിക്കോട് നടക്കുന്ന കേരള സാഹിത്യോത്സവത്തില്‍ 'ജനാധിപത്യത്തില്‍ വിയോജിപ്പിന്റെ ആവശ്യകത' എന്ന സെഷനില്‍ മാധ്യമപ്രവര്‍ത്തകന്‍ ശശികുമാറുമായുള്ള സംവാദത്തില്‍ സംസാരിക്കുകയായിരുന്നു അദ്ദേഹം.
ഭരണത്തിനെതിരേ സംസാരിക്കുന്നവരെ രാജ്യദ്രോഹികളാക്കാനുള്ള ശ്രമങ്ങളാണ് ഇന്ത്യയില്‍ നടക്കുന്നത്. ഇന്ത്യയില്‍ ആഭ്യന്തരയുദ്ധത്തിനാണ് സംഘ്പരിവാര്‍ ശ്രമിക്കുന്നത്. നിലവില്‍ ഇന്ത്യയില്‍ രാജ്യദ്രോഹം എന്ന വാക്കിന്റെ മാനംതന്നെ മാറിയിരിക്കുന്നു.
സര്‍ക്കാരിനെ വിമര്‍ശിക്കുന്നവരെ ജയിലിലടക്കുകയാണ്. ഇത്തരം ശ്രമങ്ങളെ എതിര്‍ക്കാന്‍ എല്ലാവരും രംഗത്തിറങ്ങണം.
ഇതിനായി ജനാധിപത്യശക്തികളുടെ ഐക്യമുന്നണി അനിവാര്യമാണ്. വ്യത്യസ്ത രാഷ്ട്രീയ വീക്ഷണം പുലര്‍ത്തുന്ന ബി.ജെ.പി ഇതര രാഷ്ട്രീയകക്ഷികള്‍ ഭിന്നതകള്‍ മാറ്റിവച്ച് ഒരുമിക്കേണ്ടത് കാലത്തിന്റെ ആവശ്യമാണ്. കമ്മ്യൂണിസ്റ്റുകാര്‍ക്കിടയില്‍ സ്വയംവിമര്‍ശനം ശക്തമാവേണ്ടതുണ്ട്.
നല്ല വസ്ത്രവും കാറും വൃത്തിയുള്ള വീടും സ്വന്തമായുള്ളവര്‍ മാര്‍ക്‌സിസ്റ്റുകള്‍ അല്ലെന്ന കാഴ്ചപ്പാട് ശരിയല്ല. അങ്ങനെയായിരുന്നെങ്കില്‍ സ്യൂട്ടും കോട്ടും ധരിച്ചിരുന്ന ലെനിനെപോലുള്ളവര്‍ കമ്മ്യൂണിസ്റ്റുകളല്ലെന്ന് പറയേണ്ടിവരുമെന്നും കനയ്യ കുമാര്‍ പറഞ്ഞു.