തിരുവനന്തപുരം: കെ.എസ്.ആര്‍.ടി.സിക്ക് കോടികള്‍ നഷ്ടം വരുത്തിയെന്ന കേസില്‍ മുന്‍ സി.എം.ഡിയും എക്‌സിക്യൂട്ടിവ് ഡയറക്ടര്‍മാരും ഉള്‍പ്പെടെ 10 ഉദ്യോഗസ്ഥര്‍ക്കെതിരേ അന്വേഷണത്തിന് ഉത്തരവ്. തിരുവനന്തപുരം വിജിലന്‍സ് പ്രത്യേക കോടതി ജഡ്ജി എ ബദറുദ്ദീനാണ് അന്വേഷണത്തിന് ഉത്തരവിട്ടത്.
അന്യ സംസ്ഥാനത്തേക്ക് സര്‍വിസ് നടത്തുന്ന വോള്‍വോ ബസുകള്‍ മന:പൂര്‍വം കേടു വരുത്തിയെന്നും സ്വകാര്യ ബസുടമകളെ സഹായിക്കുന്ന നിലപാട് സ്വീകരിച്ചുവെന്നുമാണ് ഇവര്‍ക്കെതിരേയുള്ള പരാതി.
കെ.എസ്.ആര്‍.ടി.സി മുന്‍ സി.എം.ഡി ആന്റണി ചാക്കോ, എക്‌സിക്യൂട്ടിവ് ഡയറക്ടര്‍ (അഡ്മിനിസ്‌ട്രേഷന്‍) കെ.എം ശ്രീകുമാര്‍, എക്‌സിക്യൂട്ടിവ് ഡയറക്ടര്‍ (വിജിലന്‍സ്) ആര്‍. ചന്ദ്രബാബു, വിജിലന്‍സ് ഓഫിസര്‍ ഇ ജോണ്‍, ചീഫ് അക്കൗണ്ട് ഓഫിസര്‍ ആര്‍ സുധാകരന്‍, തിരുവനന്തപുരം ഡിപ്പോ എന്‍ജിനീയര്‍ എസ് ഷിബു, തിരുവനന്തപുരം മുന്‍ ഡി.ടി.ഒ പി ബാബുകുമാര്‍, ഡിപ്പോ അസിസ്റ്റന്റ് എന്‍ജിനീയര്‍ ഉത്തമന്‍, വിജിലന്‍സ് ചെക്കര്‍മാരായ ആസ്റ്റിന്‍രാജ്, ശിവകുമാര്‍ എന്നിവര്‍ക്കെതിരേയാണ് അന്വേഷണത്തിന് ഉത്തരവിട്ടത്.
കഴിഞ്ഞ നവംബറില്‍ കെ.എസ്.ആര്‍.ടി.സി വിഴിഞ്ഞം ഡിപ്പോയിലെ ഡ്രൈവര്‍ വി.വൈ ശ്രീകുമാറും വിതുര ഡിപ്പോയിലെ വെഹിക്കിള്‍ സൂപ്പര്‍വൈസര്‍ ജൂഡ് ജോസഫും നല്‍കിയ ഹരജിയിലാണ് അന്വേഷണം. 2021 വരെ പെര്‍മിറ്റുള്ള പുതിയ എ.സി വോള്‍വോ ബസുകളാണ് എന്‍ജിന്‍ കേടായി കട്ടപ്പുറത്തിരിക്കുന്നത്. എന്‍ജിന്‍ കേടാക്കാന്‍ ഉദ്യോഗസ്ഥര്‍ കൂട്ടു നിന്നുവെന്നാണ് ഹരജിയിലെ ആരോപണം.
സ്വകാര്യ ബസ് ലോബിയില്‍ നിന്നും പ്രതിമാസം വന്‍തുക കൈപ്പറ്റി കെ.എസ്.ആര്‍.ടി.സിയെ നഷ്ടത്തിലാക്കുന്ന നടപടികള്‍ ഇവര്‍ സ്വീകരിച്ചിരുന്നുവെന്നും ഹരജിയില്‍ ആരോപിക്കുന്നു.