കോഴിക്കോട്: കുടുംബശ്രീ സംസ്ഥാന മിഷന്റെ നേതൃത്വത്തില്‍ സംഘടിപ്പിച്ച സംസ്ഥാന ബഡ്‌സ് കലോത്സവം സമാപിച്ചു. 31 പോയിന്റുമായി എറണാകുളം ജില്ല ജേതാക്കളായി. 23 പോയിന്റുമായി കണ്ണൂര്‍ രണ്ടാം സ്ഥാനവും 17 പോയിന്റുമായി കാസര്‍കോട് മൂന്നാം സ്ഥാനവും നേടി.
കോഴിക്കോട് ജെ.ഡി.ടി ഇസ്‌ലാമിക് എജ്യുക്കേഷണല്‍ കോംപ്ലക്‌സില്‍ നടന്ന കലോത്സവത്തിന്റെ സമാപന സമ്മേളനം മന്ത്രി ഡോ. കെടി ജലീല്‍ ഉദ്ഘാടനം ചെയ്തു. സംസ്ഥാനത്ത് 200 പുതിയ ബഡ്‌സ് സ്‌കൂളുകള്‍ ആരംഭിക്കുമെന്ന് അദ്ദേഹം പറഞ്ഞു. എട്ട് കുട്ടികള്‍ക്ക് ഒരു അധ്യാപിക എന്ന നിലവാരത്തിലേക്ക് ബഡ്‌സ് സ്‌കൂളുകളെ ഉയര്‍ത്തും. ബഡ്‌സ് ബി.ആര്‍.സി അധ്യാപകരുടേയും ജീവനക്കാരുടേയും വേതനം വര്‍ധിപ്പിച്ച് ഉത്തരവായെന്നും അദ്ദേഹം പറഞ്ഞു. കോമഡി താരം വിനോദ് കോവൂര്‍ വിവിധ കലാപരിപാടികള്‍ അവതരിപ്പിച്ചു. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി, കുടുംബശ്രീ സംസ്ഥാന മിഷന്‍ പ്രോഗ്രാം ഓഫിസര്‍ ജി.എസ് അമൃത, ജെ.ഡി.ടി പ്രസിഡന്റ് സി.പി കുഞ്ഞിമുഹമ്മദ്, സൂര്യ ഗഫൂര്‍, ടി ഗിരീഷ് കുമാര്‍, ഗിരീഷന്‍, ജോമോന്‍ കെ. ജെ സംബന്ധിച്ചു.