ശ്രീനഗര്‍: ഏറെ വികാരഭരിതമായിരുന്നു ആ പുന:സമാഗമം. 12 വര്‍ഷത്തിനു ശേഷമാണ് ആ മാതാവ് തന്റെ മോനെ കാണുന്നത്. ഇനിയൊരിക്കലുമുണ്ടാവില്ലെന്ന് കരുതിയ സമാഗമം. 2005 ഡല്‍ഹി സ്‌ഫോടനക്കേസില്‍ കുറ്റവിമുക്തനായ മുഹമ്മദ് ഹുസൈന്‍ ഫാസില്‍ തന്റെ രക്ഷിതാക്കളുമായി കണ്ട രംഗമാണിത്. 12 വര്‍ഷത്തെ ജയില്‍വാസത്തിനു ശേഷമാണ് ഈ 43 കാരന്‍ കുറ്റവിമുക്തനായത്. വ്യാഴാഴ്ചയായിരുന്നു കോടതി വിധി. 'ഒരിക്കലും ചെയ്യാത്ത കുറ്റത്തിനാണ് ശിക്ഷിക്കപ്പെട്ടത്. എന്തിനായിരുന്നു തന്റെ ജയില്‍വാസമെന്ന് ഇന്നും അറിയില്ല. എന്നെ ഇങ്ങനെയൊരവസ്ഥയില്‍ എത്തിച്ചവര്‍ ചോദ്യം ചെയ്യപ്പെടണം. എന്തിനാണ് എന്നോടിത് ചെയ്തതെന്ന് അവരോട് ചോദിക്കണം. അതാണിനി എനിക്ക് കിട്ടാവുന്ന ഏറ്റവും വലിയ നീതി'. ഫാസില്‍ പറയുന്നു.
ജയിലിലായിരിക്കെ ഒരിക്കല്‍ പോലും തന്റെ രക്ഷിതാക്കളെ കാണാന്‍ കഴിഞ്ഞില്ലെന്ന വേദനയും ഫാസില്‍ പങ്കുവെക്കുന്നു. മകന്റെ പുനര്‍ജന്മമാണിതെന്നാണ് ഫാസിലിന്റെ മാതാവ് പറയുന്നത്. മകന്റെ ജീവിതം തിരിച്ചു നല്‍കിയ ദൈവത്തിനു നന്ദി പറയുന്നതോടൊപ്പം പുതിയ നാളുകളെക്കുറിച്ച പ്രതീക്ഷയിലാണ് ഫാസിലും കുടുംബവും.