ന്യൂഡല്‍ഹി: ഐ.എന്‍.എസ് വി തരിണി എന്ന പായ്ക്കപ്പലില്‍ ലോകം ചുറ്റിവരാന്‍ തയ്യാറെടുക്കുകയാണ് ഇന്ത്യന്‍ നാവിക സേനയിലെ ആറ് വനിതകള്‍. ഇന്നലെ നടന്ന ചടങ്ങില്‍ ആദ്യ വനിതാസംഘം യാത്ര പുറപ്പെടുന്ന തരിണി നിറ്റിലിറക്കി. ഇതാദ്യമായാണ് സ്ത്രീകള്‍ മാത്രമുള്ള സംഘം പായ്ക്കപ്പലില്‍ ലോകം ചുറ്റാനിറങ്ങുന്നത്.

ഗോവയിലെ മണ്ഡോവി ബോട്ട് പൂളില്‍ വെച്ചാണ് തരിണിയുടെ നീറ്റിലിറക്കല്‍ ചടങ്ങുകള്‍ നടന്നത്. നേവി ചീഫ് അഡ്മിറല്‍ സുനിന്‍ ലാംബ അടക്കം മുതിര്‍ന്ന ഉദ്യോഗസ്ഥരും ചടങ്ങില്‍ പങ്കെടുത്തു.

ലഫ്. കമാന്‍ഡര്‍ വര്‍ത്തിക ജോഷി, ലഫ്റ്റനന്റ് പി. സ്വാതി, ലഫ്. പ്രതിഭ ജാംവാല്‍, ലഫ്. വിജയ ദേവി, ലഫ്. ഐശ്വര്യ, സബ്. ലഫ്. പായല്‍ ഗുപ്ത എന്നിവരാണു ലോകപര്യടനത്തിനു തയാറെടുക്കുന്ന ആറംഗ വനിതാ സംഘം. ആഗസ്റ്റിലാണ് ഇവര്‍ യാത്രതിരിക്കുക.