ഭൈരവ് രാഗത്തില്‍ തീന്‍ താളവുമായി ആസ്വാദകരെ ആനന്ദ ലഹരിയിലാഴ്ത്തി ഗൗരി വി ഭട്ടിന്റെ ഹിന്ദുസ്ഥാനി സംഗീതലാപനം. പെണ്‍കുട്ടികളുടെ ഹിന്ദുസ്ഥാനി സംഗീതത്തിലാണ് കാഞ്ഞങ്ങാട് നെഹ്‌റു കോളജ് ഒന്നാം വര്‍ഷ ഫിസിക്‌സ് വിദ്യാര്‍ഥിനിയായ ഗൗരിക്ക് ഒന്നാം സ്ഥാനം ലഭിച്ചത്. ഗൗരിക്ക് സര്‍വകലാശാല കലോത്സവം കന്നിയങ്കമായിരുന്നു.
നേരത്തെ ദേശീയ തലത്തില്‍ നടത്തിയ ഗാനപൂര്‍ണ പരീക്ഷയില്‍ ഒന്നാം റാങ്ക് നേടിയ ഈ കുട്ടിയുടെ സ്‌കൂള്‍ തലത്തില്‍ തുടര്‍ച്ചയായി സംഗീത മത്സരങ്ങളില്‍ ജില്ലയിലെ ഒന്നാം സ്ഥാനക്കാരിയായ ഇവരുടെ ഗുരുനാഥന്‍ പിതാവ് തന്നെയാണ്. ഹിന്ദി പദ്യത്തിലും ശാസ്ത്രീയ സംഗീതത്തിലും രണ്ടാം സ്ഥാനം നേടിയ ഗൗരി ജില്ലയ്ക്കകത്തും പുറത്തും ഒട്ടനവധി സംഗീതക്കച്ചേരികള്‍ നടത്തിയിട്ടുണ്ട്.
വിഷ്ണുസഹസ്രനാമം, ലളിതാസഹസ്രനാമം, സുബ്രമണ്യസഹസ്രനാമം എന്നീ ഓഡിയോ സി.ഡികളും പുറത്തിറങ്ങിയിട്ടുണ്ട്.
ദേശീയ അധ്യാപക അവാര്‍ഡ് നേടിയ സംഗീതാധ്യാപന്‍ വെള്ളിക്കോത്ത് വിഷ്ണു ഭട്ട് -പി ജ്യോതി ദമ്പതികളുടെ മകളാണ്.