മണിപ്പൂര്‍: 86ാം മിനുട്ടില്‍ പ്രതിരോധ താരം ആര്യന്‍ വില്യംസ് നേടിയ ഗോളില്‍ ചര്‍ച്ചിലിനെ 1-0 ത്തിന് പരാജയപ്പെടുത്തി നെരോക്ക എഫ്.സി പോയിന്റ് പട്ടികയില്‍ വീണ്ടും ഒന്നാം സ്ഥാനത്ത്. 16 മത്സരങ്ങളില്‍ നിന്ന് ഒന്‍പത് വിജയവും നാല് സമനിലയും മൂന്ന് തോല്‍വിയുമടക്കം 31 പോയിന്റോടെയാണ് നെരോക്ക ഒന്നാം സ്ഥാനത്ത് നില്‍ക്കുന്നത്.
14 കളികളില്‍ നിന്ന് ഒന്‍പത് വിജയവും രണ്ട് സമനിലയും മൂന്ന് തോല്‍വിയുമടക്കം 29 പോയിന്റുമായി മിനെര്‍വ പഞ്ചാബാണ് പട്ടികയില്‍ രണ്ടാം സ്ഥാനത്ത്. രണ്ട് മത്സരങ്ങള്‍ കുറവ് കളിച്ച മിനെര്‍വക്ക് അടുത്ത മത്സരം ജയിക്കാനായാല്‍ നെരോക്കയെ പിന്തള്ളി ഒന്നാമതെത്താം. 20ന് ഗോകുലം കേരളാ എഫ്.സിയുമാണ് മിനെര്‍വയുടെ അടുത്ത മത്സരം. കളിയിലുടനീളം ആദിപത്യം പുലര്‍ത്തിയെങ്കിലും നെരോക്കക്ക് 86ാം മിനുട്ടിലാണ് ഗോള്‍ നേടാന്‍ കഴിഞ്ഞത്. താങ്ജം സരണ്‍ സിങിന്റെ അസിസ്റ്റില്‍ നിന്നായിരുന്നു വില്യംസ് ഗോള്‍ നേടിയത്. 14 മത്സരങ്ങളില്‍ നിന്ന് അഞ്ച് ജയവും ഒരു സമനിലയും എട്ടു തോല്‍വിയുമടക്കം 16 പോയിന്റുമായി പട്ടികയില്‍ ഏഴാം സ്ഥാനത്താണ് ചര്‍ച്ചില്‍ ബ്രദേഴ്‌സ്.