മാലി: സംയുക്ത നാവികാഭ്യാസത്തിനുള്ള ഇന്ത്യയുടെ ക്ഷണം മാലദ്വീപ്. അടുത്ത മാസം നടക്കാനിരിക്കുന്ന 'മിലാന്‍' എന്ന ഇന്ത്യയുടെ സംയുക്ത നാവികാഭ്യാസത്തിലേക്കാണ് മാലദ്വീപിനേയും ക്ഷണിച്ചത്. എന്നാല്‍ മാലദ്വീപ് ക്ഷണം നിരസിച്ചതായി നാവികസേനയുടെ ചീഫ് അഡ്മിറല്‍ സുനില്‍ ലാംബെ അറിയിച്ചു.

പങ്കെടുക്കാതിക്കാനുള്ള പ്രത്യേക കാരണങ്ങളൊന്നും മാലദ്വീപ് വ്യക്തമാക്കിയിട്ടില്ലെന്നും അദ്ദേഹം പറഞ്ഞു.

മാര്‍ച്ച് ആറു മുതല്‍ 13 വരെ ആന്‍ഡമാന്‍ നിക്കോബാറില്‍ നടക്കുന്ന നാവികാഭ്യാസത്തില്‍ 16 രാജ്യങ്ങളാണ് പങ്കെടുക്കുന്നത്.

രാഷ്ട്രീയ പ്രതിസന്ധിയെ തുടര്‍ന്ന് പ്രഖ്യാപിച്ച അടിയന്തരാവസ്ഥ 30 ദിവസത്തേക്ക് കൂടി ദീര്‍ഘിപ്പിക്കാനുള്ള മാലദ്വീപിന്റെ തീരുമാനത്തിനെതിരെ ഇന്ത്യ രംഗത്തെത്തിയിരുന്നു. ഇന്ത്യയുടെ ഈ പ്രസ്താവനയാവാം നാവികാഭ്യാസത്തില്‍ നിന്നുള്ള രാജ്യത്തിന്റെ പിന്‍മാറ്റത്തിന് കാരണമെന്നാണ് സൂചന.

അതേസമയം, അടിയന്തരാവസ്ഥ 30 ദിവസത്തേക്ക് നീട്ടിയത് ഭരണഘടനാ വിരുദ്ധമെന്ന രീതിയിലാണ് ഇന്ത്യ പ്രചരിപ്പിക്കുന്നതെന്നും. ഇത് വസ്തുതകളെ ദുര്‍വ്യാഖ്യാനം ചെയ്യുന്നതാണെന്നും രാജ്യത്തെ സാഹചര്യങ്ങള്‍ തിരിച്ചറിയാതെയാണ് ഇന്ത്യ പ്രതികരിക്കുന്നതെന്നും മാലദ്വീപ് വിദേശകാര്യ മന്ത്രാലയം കുറ്റപ്പെടുത്തിയിരുന്നു.