കോഴിക്കോട്: ജെ.ജെ. ആക്ട് 2015ന് കീഴില്‍ യതീംഖാനകളെ രജിസ്റ്റര്‍ ചെയ്യാന്‍ നിര്‍ബന്ധിക്കുന്നതിനെതിരായി സമസ്ത യതീംഖാന കോ ഓഡിനേഷന്‍ കമ്മിറ്റി സുപ്രിംകോടതിയില്‍ നല്‍കിയ കേസുമായി ബന്ധപ്പെട്ട അടിയന്തര യോഗം ഇന്ന് കോഴിക്കോട്ട് നടക്കും.
യതീംഖാനകളിലെ കുട്ടികളെയും സൗകര്യങ്ങളെയും സംബന്ധിച്ച് സത്യവാങ്മൂലം മാര്‍ച്ച് 20 നകം സമര്‍പ്പിക്കാന്‍ സുപ്രിംകോടതി ആവശ്യപ്പെട്ട സാഹചര്യത്തിലാണ് സമസ്ത യതീംഖാന കോ ഓഡിനേഷന്‍ കമ്മിറ്റി യോഗം വിളിച്ചു ചേര്‍ക്കുന്നതെന്ന് ഭാരവാഹികള്‍ അറിയിച്ചു. ഇന്ന് ഉച്ചക്ക് 2 മണിക്ക് കോഴിക്കോട് ഫ്രാന്‍സിസ് റോഡിലുള്ള സമസ്ത ഓഡിറ്റോറിയത്തില്‍ ചേരുന്ന യോഗത്തില്‍ പ്രമുഖ നിയമജ്ഞരും പങ്കെടുക്കും.
കഴിഞ്ഞ ഫെബ്രുവരി 20ാം തിയതിയിലെ സുപ്രിം കോടതി ഉത്തരവില്‍ യതീംഖാനകള്‍ക്ക് ജെ.ജെ.ആക്ട് 2015 ന് കീഴിലുള്ള ശിശുക്ഷേമ സ്ഥാപനങ്ങളില്‍ നിന്നും വിഭിന്നമായ പരിഗണന നല്‍കിയിട്ടുണ്ട്. അതുകൊണ്ട് ജെ.ജെ.ആക്ട് 2015ന് കീഴില്‍ രജിസ്റ്റര്‍ ചെയ്യാന്‍ താല്‍പര്യമില്ലാത്ത മുഴുവന്‍ യതീംഖാനകളുടെയും ബന്ധപ്പെട്ട ഭാരവാഹികള്‍ യോഗത്തില്‍ പങ്കെടുക്കണമെന്ന് പ്രസിഡന്റ് സയ്യിദ് സാദിഖലി ശിഹാബ് തങ്ങളും ജനറല്‍ സെക്രട്ടറി കെ.ടി. കുഞ്ഞിമാന്‍ ഹാജിയും അറിയിച്ചു.