കണ്ണൂര്‍: എടയന്നൂരിലെ യൂത്ത് കോണ്‍ഗ്രസ് നേതാവിനെ വെട്ടികൊലപ്പെടുത്താന്‍ ഉപയോഗിച്ച ആയുധങ്ങളല്ല പൊലിസ് കണ്ടെടുത്തിരിക്കുന്നതെന്ന് കോണ്‍ഗ്രസ് നേതാവ് കെ സുധാകരന്‍. ശുഹൈബിനെ വെട്ടിയ ആയുധം വാളല്ല. ശുഹൈബിനെ വെട്ടിനുറുക്കാന്‍ ഉപയോഗിച്ചത് വാളല്ലെന്ന് സാക്ഷികളായ നൗഷാദും റിയാസും തിരിച്ചറിഞ്ഞിട്ടുണ്ടെന്നും സുധാകരന്‍ വാര്‍ത്താസമ്മേളനത്തില്‍ പറഞ്ഞു.

ഇരുന്നുവെട്ടി മാംസം പോലും ചിതറിക്കുന്നതരത്തില്‍ നീളം കുറഞ്ഞ ആയുധമാണ് ഉപയോഗിച്ചത്. കൊലയാളികളുടെ പണിയായുധം എവിടെയെങ്കിലും ഉപേക്ഷിക്കുമെന്ന് വിശ്വസിക്കുന്നില്ലെന്നും കെ.സുധാകരന്‍ പറഞ്ഞു. കാരണം അത് അവര്‍ക്ക് ആവശ്യമുള്ള ആയുധമാണ്. അന്വേഷണം വഴിതെറ്റിക്കാന്‍ സി.പി.എം ശ്രമിക്കുന്നു എന്നതിന് തെളിവാണ് കൊണ്ടിടുന്ന വാളുകളെന്നും സുധാകരന്‍ ആരോപിച്ചു.