മല്ലു ഹിന്ദു ഓഫിസേഴ്‌സ് വിവാദ വാട്‌സ്ആപ്പ് ഗ്രൂപ്പ് പരാതിയില്‍ കേസെടുക്കാന്‍ തെളിവില്ലെന്ന് സൈബര്‍ പൊലിസ്.  പ്രാഥമിക അനേവഷണത്തിന് ശേഷമായിരിക്കും കേസെടുക്കുക. തെളിവ് തേടി വാട്‌സ് ആപ്പിനെ സമീപിച്ചതായും സൈബര്‍ പൊലിസ് അറിയിച്ചു.

വ്യവസായ വകുപ്പ് സെക്രട്ടറി കെ. ഗോപാലകൃഷ്ണന്‍ നല്‍കിയ പരാതിയാണ് സൈബര്‍ പൊലിസ് അന്വേഷിക്കുന്നത്. തന്റെ ഫോണ്‍ ഹാക്ക് ചെയ്ത് ആരോ ഗ്രൂപ്പുണ്ടാക്കിയെന്നാണ് ഗോപാലകൃഷ്ണന്റെ പരാതി. വിഷയത്തില്‍ ഗോപാലകൃഷ്ണന്റെ വിശദീകരണം തേടിയേക്കും.

കഴിഞ്ഞ ദിവസമാണ് സംസ്ഥാനത്തെ മുതിര്‍ന്ന ഹിന്ദു ഐ.എ.എസ് ഉദ്യോഗസ്ഥരെ ഉള്‍പ്പെടുത്തിക്കൊണ്ട് ഒരു വാട്‌സ്ആപ്പ് ഗ്രൂപ്പ് ഉണ്ടാകുന്നത്. വ്യവസായ വകുപ്പ് സെക്രട്ടറി കെ. ഗോപാലകൃഷ്ണനാണ് ഗ്രൂപ്പിന്റെ അഡ്മിന്‍. ഗ്രൂപ്പിന്റെ പേര് മല്ലു ഹിന്ദു ഓഫീസേഴ്‌സ്. ഗ്രൂപ്പില്‍ ചേര്‍ക്കപ്പെട്ട ഉദ്യോഗസ്ഥര്‍ ചില ചോദ്യങ്ങള്‍ ഉയര്‍ത്തിയതോടെ ഗ്രൂപ്പ് ഡിലീറ്റ് ചെയ്യുകയായിരുന്നു. തുടര്‍ന്നാണ് ഗ്രൂപ്പില്‍ ആഡ് ചെയ്യപ്പെട്ട ഉദ്യോഗസ്ഥര്‍ക്ക് ഗോപാലകൃഷ്ണന്‍ മെസ്സേജ് അയക്കുന്നത്. തന്റെ ഫോണ്‍ ഹാക്ക് ചെയ്യപ്പെട്ടെന്നും അതിന്റെ ഭാഗമായിട്ടാണ് ഇതുണ്ടായതെന്നുമായിരുന്നു വിശദീകരണം.

 സംഭവം ചര്‍ച്ചയായതോടെ ഫോണ്‍ ഹാക്ക് ചെയ്യപ്പെട്ടെന്നാരോപിച്ച് ഗോപാലകൃഷ്ണന്‍ തിരുവനന്തപുരം സിറ്റി പൊലിസ് കമ്മീഷണര്‍ക്ക് പരാതി നല്‍കുകയും ചെയ്തു. പിന്നാലെ പരാതി കമ്മീഷണര്‍ സിറ്റി സൈബര്‍ പൊലിസിന് കൈമാറി. പരാതിയില്‍ കേസെടുത്ത് അന്വേഷണം നടത്തുമെന്ന് സൈബര്‍ പൊലിസ് അറിയിക്കുകയായിരുന്നു. പരിശോധിച്ച ശേഷം നടപടിയെടുക്കുമെന്നാണ് സംഭവത്തില്‍ വകുപ്പുമന്ത്രി പ്രതികരിച്ചത്.