കൊണ്ടോട്ടി: കരിപ്പൂർ വിമാനത്താവളത്തിലെ റൺവേ എൻഡ് സേഫ്റ്റി ഏരിയ(റെസ)വിപുലീകരണത്തിന് ആവശ്യമായ മണ്ണ് കണ്ടെത്തുന്നതിലുള്ള   പ്രതിസന്ധിക്ക് ഇതുവരെ പരിഹാരമായില്ല. റൺവേ വികസനത്തിന് 33 ലക്ഷം ക്യൂബിക് മീറ്റർ മണ്ണാണ് ആവശ്യമായി വരുന്നത്. ഇതിനായി  വിമാനത്താവളത്തിന്  15 കിലോമീറ്റർ ചുറ്റളവിലുള്ള മൈനിങ് സൈറ്റുകൾ മലപ്പുറം ജില്ലയിൽ തന്നെ കണ്ടെത്തിയിട്ടുണ്ട്. എന്നാൽ ഇതിന്  ഇതുവരെ അനുമതി ലഭിച്ചിട്ടില്ല.

റെസ നിർമാണം 2025 സെപ്റ്റംബറോടെ പൂർത്തിയാക്കാനാണ് തീരുമാനം. ഇതിനായി 12.5 ഏക്കർ സ്ഥലം സംസ്ഥാന സർക്കാർ ഏറ്റെടുത്ത് നൽകിയിട്ട് ഒരുവർഷമായി. ഇവിടെയുണ്ടായിരുന്ന വീടുകളും മരങ്ങളും ഒഴിവാക്കി പ്രദേശം നിരപ്പാക്കിയിട്ടും മാസങ്ങളായി.   78 ഭൂവുടമകളാണ് മണ്ണെടുപ്പിന് അനുമതി അറിയിച്ച് രംഗത്തെത്തിയത്. എന്നാൽ ഇതിന് ജിയോളജി വിഭാഗത്തിന്റെ പെർമിഷൻ ലഭ്യമാക്കണം.

 പ്രശ്‌ന പരിഹാരത്തിനായി ജനപ്രതിനിധികളുടെ നേതൃത്വത്തിൽ മുഖ്യമന്ത്രിയെ കാണാൻ വിമാനത്താവള ഉപദേശക സമിതി യോഗം കഴിഞ്ഞ മാസം തീരുമാനിച്ചിരുന്നു. എന്നാൽ ഇതടക്കം നടന്നിട്ടില്ല. റെസ നിർമാണത്തിനുള്ള മറ്റു രേഖകളെല്ലാം ലഭ്യമായതാണ്. വിമാനങ്ങൾ ലാൻഡിങ് സമയത്ത് റൺവേയിൽ നിന്ന് തെന്നിമാറിയാൽ പിടിച്ച് നിർത്തുന്ന ചതുപ്പുപോലുള്ള പ്രദേശമാണ് റെസ. റൺവേയുടെ രണ്ട് അറ്റങ്ങളിലുമാണ് റെസ നിർമിക്കുന്നത്. കരിപ്പൂരിൽ വിമാന അപകടത്തെ തുടർന്നാണ് റെസ വിപുലീകരണം വ്യോമയാന മന്ത്രാലയം ആവശ്യപ്പെട്ടത്.