തിരുവനന്തപുരം: വിവാദങ്ങള്‍ക്കിടയില്‍ ആറ്റുകാല്‍ ക്ഷേത്രത്തില്‍ നടക്കുന്ന കുത്തിയോട്ടത്തിന് പിന്തുണയുമായി ദേവസ്വം മന്ത്രി കടകംപള്ളി സുരേന്ദ്രന്‍. കുത്തിയോട്ടത്തിനെതിരേ ഇപ്പോള്‍ ചാടി വീഴേണ്ടതില്ലെന്ന് അദ്ദേഹം പറഞ്ഞു.
മുന്‍ വര്‍ഷങ്ങളേക്കാള്‍ ഭംഗിയായി കൂടുതല്‍ കുട്ടികളുടെ പങ്കാളിത്തത്തോടെ ഇത്തവണ കുത്തിയോട്ടം നടക്കും. ബാലാവകാശ ലംഘനം ഉണ്ടോ എന്ന് പരിശോധിച്ചു പറയേണ്ടതാണെന്നും മന്ത്രി മാധ്യമങ്ങളോട് പറഞ്ഞു.
ആറ്റുകാല്‍ ക്ഷേത്രത്തില്‍ പൊങ്കാലയുടെ ഭാഗമായി നടക്കുന്ന കുത്തിയോട്ടത്തിനെതിരേ എ.ഡി.ജി.പി ആര്‍. ശ്രീലേഖ ബ്ലോഗെഴുതിയതിനെ തുടര്‍ന്ന് ഇതു സംബന്ധിച്ച് വിവാദം ഉയര്‍ന്നിരുന്നു. ഇതിനെ തുടര്‍ന്ന് കുത്തിയോട്ടത്തിനെതിരേ ബാലവകാശ കമ്മിഷന്‍ കേസെടുത്തിട്ടുമുണ്ട്. ബാലാവകാശ ലംഘനം നടക്കുന്നു എന്ന ആരോപണത്തിന്റെ അടിസ്ഥാനത്തിലാണ് കേസെടുത്തത്.
ആചാരത്തിന്റെ പേരില്‍ കുത്തിയോട്ടത്തില്‍ കുട്ടികളെ ശാരീരികമായും മാനസികമായും പീഡനത്തിന് ഇരയാക്കുകയാണെന്നും ദേവിയുടെ പ്രീതിക്കായി കുട്ടികളുടെ ചോര വരെ എടുക്കുന്ന പ്രാകൃതമായ രീതി ക്രിമിനല്‍ കുറ്റമാണെന്നും ഇത് അവസാനിപ്പിക്കാന്‍ ഭക്തരും ക്ഷേത്ര ഭാരവാഹികളും തയാറാകണമെന്നും ശ്രീലേഖ ബ്ലോഗില്‍ കുറിച്ചിരുന്നു.