ബംഗളൂരു: മുതിര്‍ന്ന മാധ്യമ പ്രവര്‍ത്തക ഗൗരി ലങ്കേഷിനെ വെടിവച്ച് കൊലപ്പെടുത്തിയ കേസില്‍ ഒരാള്‍ അറസ്റ്റില്‍. കഴിഞ്ഞ വര്‍ഷം സെപ്റ്റംബര്‍ അഞ്ചിനാണ് വീട്ടിന് മുന്‍പില്‍ വച്ച് ഗൗരി വെടിയേറ്റ് മരിച്ചത്.
കഴിഞ്ഞ ഫെബ്രുവരി 18ന് വെടിയുണ്ടകളുമായി പൊലിസ് കസ്റ്റഡിയിലെടുത്ത ദക്ഷിണ കന്നഡ സ്വദേശി കെ.ടി നവീന്‍ കുമാറിനെയാണ് ഇന്നലെ പൊലിസ് അറസ്റ്റ് ചെയ്തത്. മദൂരിലുള്ള തന്റെ സുഹൃത്തുക്കളുമായി തോക്കിനെക്കുറിച്ചും സ്‌ഫോടക വസ്തുക്കളെക്കുറിച്ചും സംസാരിച്ചതുമായി ബന്ധപ്പെട്ട്് ക്രൈം ബ്രാഞ്ച് കസ്റ്റഡിയിലെടുത്ത ഇയാളെ ഗൗരി ലങ്കേഷ് വധവുമായി ബന്ധമുണ്ടെന്ന് വ്യക്തമായതോടെയാണ് പൊലിസ് അറസ്റ്റ് ചെയ്തത്.
ഹിന്ദു തീവ്രവാദ സംഘടനയായ ഹിന്ദുയുവസേനയുമായി ഇയാള്‍ക്ക് ബന്ധമുണ്ടെന്ന് കണ്ടെത്തിയിട്ടുണ്ട്. കൂടാതെ ഇയാള്‍ സനാതന്‍ സന്‍സ്തയിലും പ്രവര്‍ത്തിക്കുന്നുണ്ട്. ഇയാളില്‍ നിന്ന് വ്യത്യസ്ത റേഞ്ചിലുള്ള വെടിയുണ്ടകളും പിടിച്ചെടുത്തിട്ടുണ്ട്. ഇയാളെ ചോദ്യം ചെയ്തുകൊണ്ടിരിക്കുകയാണെന്ന് പൊലിസ് അറിയിച്ചു.