കാസര്‍കോട്: നിലേശ്വരം സ്വദേശികള്‍ സഞ്ചരിച്ചിരുന്ന കാറും ലോറിയും കൂട്ടിയിടിച്ചു കാറിലുണ്ടായിരുന്ന നാലുവയസ്സുകാരന്‍ മരിച്ചു. ഒപ്പമുണ്ടായിരുന്ന അഞ്ച് പേര്‍ക്ക് പരുക്കേറ്റു. അമാന്‍(4)ആണ് അപകടത്തില്‍ മരിച്ചത്.

ദേശീയപാത 766 ല്‍ ബത്തേരി കൊളഗപ്പാറ ഉജാല പടിക്ക് സമീപം ഇന്ന് രാവിലെ 7.30 യോടെയാണ് അപകടം. കല്‍പ്പറ്റ ഭാഗത്തേക്ക് പോവുകയായിരുന്ന ലോറിയും ബത്തേരിഭാഗത്തേക്ക് പോവുകയായിരുന്ന കാറുമാണ് അപകടത്തില്‍പ്പെട്ടത്. പരുക്കേറ്റ മൂന്ന് പേരെ ബത്തേരി സ്വകാര്യ ആശുപത്രിയിലും ഗുരുതരമായി പരുക്കേറ്റ രണ്ട് പേരെ കോഴിക്കോട് മെഡിക്കല്‍ കോളേജ് ആശുപത്രിയിലുമായി പ്രവേശിപ്പിച്ചു. അപകടത്തില്‍ കാറിന്റെ മുന്‍ ഭാഗം പൂര്‍ണമായും തകര്‍ന്നു.