തൃശൂര്‍: കേരളത്തില്‍ സി.പി.എമ്മും ബി.ജെ.പിയും ഒരേപോലെ കോണ്‍ഗ്രസിന്റെ മുഖ്യശത്രുക്കളാണെന്ന് കെ.പി.സി.സി പ്രസിഡന്റ് എം.എം ഹസന്‍. ത്രിപുര നിയമസഭാതെരഞ്ഞെടുപ്പ് ഫലത്തോടെ സീതാറാം യെച്ചൂരി പറഞ്ഞതുപോലെ സി.പി.എം കമ്മ്യൂണിസ്റ്റ് പാര്‍ട്ടി ഓഫ് കേരളയായി മാറി.
ത്രിപുര തെരഞ്ഞെടുപ്പ് ഫലം സി.പി.എമ്മിന്റെ കണ്ണുതുറക്കാന്‍ ഉപകരിക്കട്ടെയെന്നും ഹസന്‍ തൃശൂരില്‍ മാധ്യമപ്രവര്‍ത്തകരോട് പറഞ്ഞു. ബീഹാറിന് സമാനമായി മതേതര ജനാധിപത്യസഖ്യം ഉണ്ടാക്കാന്‍ സി.പി.എം ത്രിപുരയില്‍ തയാറായിരുന്നുവെങ്കില്‍ തെരഞ്ഞെടുപ്പ് ഫലം മറ്റൊന്നാകുമായിരുന്നു. ബി.ജെ.പിയെ ഒറ്റയ്ക്ക് തടുത്തുനിര്‍ത്താന്‍ സി.പി.എമ്മിന് ഒരിക്കലും കഴിയില്ല. കേരളത്തില്‍ കോണ്‍ഗ്രസ് സി.പി.എമ്മുമായി ഒരു ഐക്യത്തിനുമില്ലെന്നും ഹസന്‍ വ്യക്തമാക്കി.