കൊല്‍ക്കത്ത: രാജ്യത്തെ സി.പി.എം സ്വാധീന മേഖലയായിരുന്ന മൂന്ന് സംസ്ഥാനങ്ങളില്‍ ആദ്യം പാര്‍ട്ടിക്ക് തിരിച്ചടി നല്‍കിയത് ബംഗാളായിരുന്നു.
ഇവിടത്തെ രാഷ്ട്രീയത്തില്‍ നിര്‍ണായക സ്വാധീനമുണ്ടായിരുന്ന സി.പി.എം സംസ്ഥാനത്ത് ഭരിച്ചത് 33 വര്‍ഷമായിരുന്നു. ടാറ്റയുടെ കാര്‍ നിര്‍മാണ യൂനിറ്റിന് കൃഷിഭൂമി പിടിച്ചെടുത്തതില്‍ നിന്ന് തുടങ്ങിയ തിരിച്ചടി തെരഞ്ഞെടുപ്പില്‍ പാര്‍ട്ടിയുടെ അസ്ഥിവാരം ഇളക്കുന്നതായിരുന്നു. ഒരിക്കല്‍പോലും ബംഗാളില്‍ ഒരു തിരിച്ചുവരവിന് ശേഷിയില്ലാത്ത വിധത്തില്‍ തകര്‍ന്നടിഞ്ഞ സി.പി.എം, ഇപ്പോഴിതാ ത്രിപുരയിലും കാലിടറി വീണിരിക്കുന്നു.
ഒരിക്കലും പാര്‍ട്ടിയെ ത്രിപുരക്കാര്‍ കൈവിടില്ലെന്ന ഉറച്ച വിശ്വാസത്തിലായിരുന്നു പാര്‍ട്ടി നേതൃത്വം. കഴിഞ്ഞ തവണ 60 സീറ്റുകളില്‍ 49ഉം പിടിച്ചെടുത്ത മണിക് സര്‍ക്കാര്‍, ഇത്തവണ കനത്ത തോല്‍വിയിലേക്ക് കൂപ്പുകുത്തിയപ്പോള്‍ അത് കേവലമൊരു തെരഞ്ഞെടുപ്പ് തോല്‍വി മാത്രമല്ല, ഇന്ത്യന്‍ രാഷ്ട്രീയത്തിലെ ഒരു പ്രമുഖ രാഷ്ട്രീയ പാര്‍ട്ടിയുടെ പതനം കൂടിയാണ് .രാജ്യത്തെ ഏറ്റവും ദരിദ്രനായ മുഖ്യമന്ത്രി എന്ന മണിക് സര്‍ക്കാരിന്റെ ലാളിത്യമോ അഴിമതിവിരുദ്ധ പ്രതിച്ഛായയോ ഈ തെരഞ്ഞെടുപ്പില്‍ സി.പി.എമ്മിന് രക്ഷാകവചം തീര്‍ത്തില്ല.
കൂടാതെ പാര്‍ട്ടിയില്‍ ജനറല്‍ സെക്രട്ടറി സീതാറാം യെച്ചൂരിയും പൊളിറ്റ് ബ്യൂറോ അംഗം പ്രകാശ് കാരാട്ടും ഉയര്‍ത്തിപ്പിടിക്കുന്ന രണ്ട് നിലപാടുകള്‍ സി.പി.എമ്മിന്റെ അടിത്തറക്ക് ഇളക്കം തട്ടിച്ചിട്ടുണ്ട്. ത്രിപുരകൂടി തകര്‍ന്നതോടെ സി.പി.എം കേരളത്തില്‍ മാത്രമായി ചുരുങ്ങിയിരിക്കുകയാണ്. ബി.ജെ.പി അടക്കമുള്ള വര്‍ഗീയ ശക്തികളെ നേരിടാന്‍ കോണ്‍ഗ്രസുമായി കൂട്ടുചേരണമെന്ന യെച്ചൂരി ലൈന്‍ ത്രിപുര തെരഞ്ഞെടുപ്പ് ഫലത്തോടെ പാര്‍ട്ടിയില്‍ ശക്തമായേക്കും.