ബെയ്ജിങ്: അടുത്ത സാമ്പത്തിക വര്‍ഷത്തില്‍ ചൈന പ്രതിരോധ വിഹിതം 8.1 ശതമാനമാക്കി വര്‍ധിപ്പിച്ചു. ഇതോടെ പ്രതിരോധ മേഖലയ്ക്കായി ചൈന വകയിരുത്തിയ തുക 175 ബില്യണ്‍ യു.എസ് ഡോളറായി ഉയര്‍ന്നു. കഴിഞ്ഞ വര്‍ഷം ഏഴു ശതമാനമായിരുന്നു വര്‍ധിപ്പിച്ചത്.
അമേരിക്കയ്ക്കു ശേഷം പ്രതിരോധ മേഖലയില്‍ ഏറ്റവും കൂടുതല്‍ തുക ചെലവഴിക്കുന്ന രാജ്യമാണ് ചൈന. 686 ബില്യണ്‍ ഡോളറാണ് അടുത്ത വര്‍ഷത്തേക്ക് പെന്റഗണ്‍ ആവശ്യപ്പെട്ടിരിക്കുന്ന വിഹിതം.
എന്നാല്‍ ചൈനയുടെ പ്രതിരോധ മേഖലയിലെ വിഹിതം വര്‍ധിപ്പിച്ചത് ഇന്ത്യ ഗൗരവത്തോടെയാണു കാണുന്നത്. ഇന്ത്യയുടെ പ്രതിരോധ ചെലവിനെക്കാള്‍ മൂന്നിരിട്ടയിലേറെയാണിത്. 46 ബില്യണ്‍ യു.എസ് ഡോളറാണു കഴിഞ്ഞ മാസം അവതരിപ്പിച്ച ബജറ്റില്‍ പ്രതിരോധത്തിനായി ഇന്ത്യ വകയിരുത്തിയത്.
ലോകത്തിലെ ഏറ്റവും വലിയ സൈന്യമായ ചൈനീസ് ലിബറേഷന്‍ ആര്‍മിയുടെ എണ്ണത്തില്‍ കുറവ് വരുത്താന്‍ സര്‍ക്കാര്‍ തീരുമാനിച്ചിരുന്നു.