കോഴിക്കോട്: സാങ്കേതിക വിദ്യാഭ്യാസ വകുപ്പിന്റെ 59- ാമത് സംസ്ഥാന പോളിടെക്‌നിക് കായികമേളയ്ക്ക് കോഴിക്കോട്ട്് തുടക്കമായി. സംസ്ഥാനത്തെ 70 പോളിടെക്‌നിക് കോളജുകളില്‍ നിന്നായി 800 ലധികം വിദ്യാര്‍ഥികളാണ് മേളയില്‍ പങ്കെടുക്കുന്നത്.
14 ഇനങ്ങളിലായി ഫൈനല്‍ മത്സരങ്ങള്‍ നടന്നപ്പോള്‍ തൃശൂര്‍ അളഗപ്പ നഗര്‍ ത്യാഗരാജ പോളിടെക്‌നിക് കോളജ് 28 പോയിന്റുമായി ഒന്നാം സ്ഥാനത്താണ്. വയനാട് മീനങ്ങാടി ഗവ.പോളിടെക്‌നിക് കോളജ് 21 പോയിന്റുമായി രണ്ടാം സ്ഥാനത്തും, തൃശൂര്‍ വിമന്‍സ് പോളി ടെക്‌നിക് 16 പോയിന്റുമായി മൂന്നാം സ്ഥാനത്തും, എറണാകുളം വിമന്‍സ് കോളജ് 11 പോയിന്റുമായി നാലാം സ്ഥാനത്തും തുടരുകയാണ്.
പുരുഷ വിഭാഗത്തില്‍ റിലേയടക്കം ഏഴിനത്തില്‍ ഫൈനല്‍ നടന്നപ്പോള്‍ തൃശൂര്‍ ത്യാഗരാജ പോളിടെക്‌നിക് കോളജ് (20 പോയിന്റ്) ഒന്നാം സ്ഥാനത്തും, മീനങ്ങാടി ഗവ. പോളിടെക്‌നിക് കോളജ് (15 പോയിന്റ്) രണ്ടാമതും, ആലപ്പുഴ കാര്‍മെല്‍ പോളിടെക്‌നിക് കോളജ് (9 പോയിന്റ്) മൂന്നമതുമാണ്. ഏഴിനത്തില്‍ ഫൈനല്‍ പൂര്‍ത്തിയായപ്പോള്‍ തൃശൂര്‍ വിമന്‍സ് പോളി ടെക്‌നിക് 16 പോയിന്റുമായി ഒന്നാം സ്ഥാനത്തുണ്ട്. എറണാകുളം വിമന്‍സ് പോളിടെക്‌നിക് കോളജ് 11 പോയിന്റുമായി രണ്ടാമതും, തൃശൂര്‍ അളഗപ്പ നഗര്‍ ത്യാഗരാജ പോളിടെക്‌നിക് കോളജ് 8 പോയിന്റുമായി മൂന്നാമതുമാണ്. രാവിലെ സ്റ്റേഡിയത്തില്‍ നടന്ന ചടങ്ങില്‍ മേയര്‍ തോട്ടത്തില്‍ രവീന്ദ്രന്‍ മേള ഉദ്ഘാടനം ചെയ്തു. ഇന്ന് പുരുഷ-വനിതാ വിഭാഗങ്ങളിലായി 17 ഇനങ്ങളുടെ ഫൈനല്‍ നടക്കും. വൈകിട്ട് നടക്കുന്ന സമാപന ചടങ്ങില്‍ കേരള സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ സമ്മാനം വിതരണം ചെയ്യും.