കോറോം: കോറോം ടൗണില്‍ വീണ്ടും മോഷണം. ടൗണിലെ പഴഞ്ചേരി ട്രെഡേഴ്‌സ് ആന്‍ഡ് ഇലക്ട്രിക്കല്‍സിലാണ് കഴിഞ്ഞ ദിവസം പുലര്‍ച്ചെ മോഷണം നടന്നത്. മോഷണത്തോടൊപ്പം കടയില്‍ സ്ഥാപിച്ചിരുന്ന സി.സി.ടി.വി ഉപകരണങ്ങളും 15000 രൂപയും മോഷ്ടാക്കള്‍ കവര്‍ന്നു.
പുലര്‍ച്ചെ മൂന്ന് വരെ ടൗണില്‍ പൊലിസും വ്യാപാരികള്‍ നിയമിച്ച കാവല്‍ക്കാരനും ഉണ്ടായിരുന്നിട്ടും കവര്‍ച്ച നടന്നതിനാല്‍ പ്രദേശവാസികള്‍ ആശങ്കയിലായിരിക്കുകയാണ്. ദിവസങ്ങള്‍ക്ക് മുന്‍പാണ് ചീപ്പാട് മുരുകാലയ ഫര്‍ണിച്ചര്‍ ഉടമയുടെ വീട്ടിലും കൂട്ടപ്പാറ ഹബീബിന്റെ വീട്ടിലും കവര്‍ച്ച നടന്നത്.
രാമന്റെ വീടുകള്‍ കുത്തിതുറന്നെങ്കിലും വീടിനകത്തെ സാധനങ്ങളൊന്നും അപഹരിക്കപ്പെട്ടില്ല. എന്നാല്‍ വീട്ടുമുറ്റത്ത് നിര്‍ത്തിയിട്ട സ്‌കൂട്ടര്‍ മോഷ്ടാക്കള്‍ കൊണ്ടുപോയിരുന്നു.
പ്രസ്തുത കേസില്‍ അന്വേഷണം നടത്തി മോഷ്ടാക്കളെ കണ്ടെത്തുവാനോ ബൈക്ക് വീണ്ടെടുക്കാനോ പൊലിസിന് കഴിഞ്ഞിട്ടില്ല. ഇതിനിടെയാണ് നാട്ടുകാരെ ആശങ്കയിലാഴ്ത്തി വീണ്ടും മോഷണ സംഭവം നടന്നത്. എത്രയും വേഗത്തില്‍ മോഷ്ടാക്കളെ കണ്ടെത്തി പ്രദേശവാസികളുടെ ആശങ്കയകറ്റണമെന്നതാണ് നാട്ടുകാരുടെ ആവശ്യം.