റിയാദ്: സഊദിയില്‍ റെന്റ് എ കാര്‍ മേഖലയില്‍ സമ്പൂര്‍ണ സഊദിവല്‍ക്കരണമില്ല. ഈ മാസം 18 മുതല്‍ നൂറു ശതമാനം സഊദിവല്‍ക്കണം നടപ്പാക്കാനുള്ള തീരുമാനത്തില്‍നിന്ന് തൊഴില്‍ മന്ത്രാലയം പിന്‍വാങ്ങുകയായിരുന്നു.
സഊദി തൊഴില്‍ സാമൂഹിക വികസന മന്ത്രാലയ വക്താവ് ഖാലിദ് അബല്‍ ഖൈലാണ് ഇക്കാര്യം വ്യക്തമാക്കിയത്. ഈ മേഖലയില്‍ തെരഞ്ഞെടുക്കപ്പെട്ട അഞ്ചു തസ്തികകളില്‍ മാത്രമാണ് സമ്പൂര്‍ണ സഊദിവല്‍ക്കരണം നടപ്പാക്കുകയുള്ളൂവെന്നും ബാക്കി തസ്തികകളില്‍ വിദേശികള്‍ക്ക് തുടരാമെന്നും അദ്ദേഹം വ്യക്തമാക്കി. റെന്റ് എ കാര്‍ സ്ഥാപനങ്ങളിലെ അക്കൗണ്ടന്റ് തസ്തികകള്‍, വില്‍പന വിഭാഗം, സൂപ്പര്‍വൈസര്‍ തസ്തികകള്‍, വാഹനം ഏറ്റെടുക്കല്‍, ഏല്‍പ്പിച്ചുനല്‍കല്‍ തുടങ്ങിയ അഞ്ചു മേഖലകളാണ് സഊദികള്‍ക്ക് മാത്രമായി സംവരണം ചെയ്തിരിക്കുന്നത്. കഴിഞ്ഞ സെപ്റ്റംബറിലാണ് ആറുമാസത്തെ സാവകാശത്തോടെ റെന്റ് എ കാര്‍ മേഖലയിലെ സഊദിവല്‍ക്കരണം പ്രഖ്യാപിച്ചത്. ഓരോ മേഖലകളിലും ഘട്ടംഘട്ടമായി സഊദിവല്‍ക്കരണം നടപ്പാക്കുന്നതിന്റെ ഭാഗമായാണ് റെന്റ് എ കാര്‍ മേഖലയിലും സഊദിവല്‍ക്കരണം പ്രഖ്യാപിച്ചത്. മലയാളികളടക്കം ആയിരക്കണക്കിന് വിദേശികളാണ് ഈ മേഖലയില്‍ ജോലിചെയ്യുന്നത്.