പോര്‍ട്ട് എലിസബത്ത്: ദക്ഷിണാഫ്രിക്കയും ആസ്‌ത്രേലിയയും തമ്മിലുള്ള രണ്ടാം ടെസ്റ്റില്‍ വിക്കറ്റ് വേട്ട നടത്തിയ കാസിഗോ റബാഡ ബൗളര്‍മാരുടെ റാങ്കിങ്ങില്‍ ഒന്നാം സ്ഥാനത്ത്. ജെയിംസ് ആന്‍ഡേഴ്‌സനെ പിന്തള്ളിയാണ് റബാഡ നേട്ടം സ്വന്തമാക്കിയത്. 902 പോയിന്റുമായണ് റബാഡ ഒന്നാം സ്ഥാനത്തെത്തിയത്. നേരത്തെ 887 പോയിന്റുമായി ആന്‍ഡേഴ്‌സനായിരുന്നു ഒന്നാം സ്ഥാനത്ത്. നിലവില്‍ ഒന്നും രണ്ടും സ്ഥാനക്കാര്‍ തമ്മില്‍ 15 പോയിന്റിന്റെ വ്യത്യാസമാണുള്ളത്. പോര്‍ട്ട് എലിസബത്തില്‍ ആസ്‌ത്രേലിയക്കെതിരേയുള്ള 11 വിക്കറ്റ് നേട്ടമാണ് റാങ്കിങ്ങില്‍ ഒന്നാമതെത്താന്‍ റബാഡയെ സഹായിച്ചത്. പുതിയ പട്ടിക പുറത്തു വിട്ടിട്ടില്ലെങ്കിലും ഐ. സി. സി ട്വിറ്ററിലൂടെയാണ് ഇക്കാര്യം അറിയിച്ചത്.