തിരൂര്‍: ഡി.ജെ പാര്‍ട്ടികളില്‍ ഉപയോഗിക്കുന്ന വന്‍ വില വരുന്ന മീഥെലിന്‍ ഡയോക്‌സി മെത്താം ഫെറ്റമിന്‍ (എം.ഡി.എം.എ) എന്ന മയക്കുമരുന്ന് തിരൂരില്‍ പിടികൂടി. ഗോവയില്‍ നിന്ന് ട്രെയിന്‍ മാര്‍ഗം തിരൂരിലെത്തിയ തേഞ്ഞിപ്പലം ചെനക്കലങ്ങാടി സ്വദേശി പൊറോളില്‍ വീട്ടില്‍ ആദില്‍ മുഹമ്മദില്‍ (25) നിന്ന് എക്‌സൈസ് സംഘവും ആര്‍.പി.എഫ് ഉദ്യോഗസ്ഥരും ചേര്‍ന്നാണ് മയക്കുമരുന്ന് പിടികൂടിയത്. ഇയാളെ ജാമ്യമില്ലാ വകുപ്പ് പ്രകാരം അറസ്റ്റ് ചെയ്തു.
8000 രൂപ വില വരുന്ന ഒരു ഗ്രാം മയക്കുമരുന്നാണ് പിടിച്ചെടുത്തതെന്നും കേസില്‍ ഉന്നത തല അന്വേഷണം ആവശ്യമാണെന്നും എക്‌സൈസ് ഇന്‍സ്‌പെക്ടര്‍ എം.വി ദാമോദരന്‍ പറഞ്ഞു. തിരൂര്‍ എക്‌സൈസ് റേഞ്ച് ഓഫിസ് പരിധിയില്‍ ഇതാദ്യമായാണ് ഇത്തരമൊരു മയക്കുമരുന്ന് കേസ് രജിസ്റ്റര്‍ ചെയ്യുന്നത്. വ്യാഴാഴ്ച വൈകിട്ട് മൂന്നിന് മയക്കുമരുന്നുമായി യുവാവിനെ പിടികൂടിയെന്നാണ് ഔദ്യോഗിക ഭാഷ്യം. യുവാവ് സ്ഥിരമായി മയക്കുമരുന്ന് ഉപയോഗിക്കുന്നയാളാണെന്നും വില്‍പ്പനക്കല്ല ഗോവയില്‍ നിന്ന് എം.ഡി.എം.എ കൊണ്ടുവന്നതെന്നും എക്‌സൈസ് ഉദ്യോഗസ്ഥര്‍ വ്യക്തമാക്കി.