ചെറുവത്തൂര്‍: അധ്യാപക യോഗ്യതാ പരീക്ഷയായ കെ- ടെറ്റ് 'കടമ്പ' കടക്കാന്‍ പാടുപെടുന്നവര്‍ക്ക് ആശ്വാസമായി അധ്യാപകരാകാനുള്ള യോഗ്യതാ മാനദണ്ഡങ്ങളില്‍ ഇളവുകള്‍. എല്‍ പി, യു.പി അധ്യാപകരാകാന്‍ ഇനി കാറ്റഗറി ഒന്ന്, രണ്ട് പരീക്ഷകളില്‍ ഏതെങ്കിലും ഒന്നില്‍ വിജയം നേടിയാല്‍ മതി. കേരള വിദ്യാഭ്യാസ ചട്ട ഭേദഗതിയുടെ ഭാഗമായായുള്ള തീരുമാനമാണിത്. എയ്ഡഡ് വിദ്യാലയങ്ങളില്‍ ജോലി ചെയ്യുന്ന നൂറുകണക്കിന് അധ്യാപകര്‍ക്ക് ആശ്വാസമാകുന്നതാണ് ഈ നടപടി.
കേന്ദ്ര വിദ്യാഭ്യാസ അവകാശ നിയമത്തിന്റെ അടിസ്ഥാനത്തിലാണ് 2012 മുതല്‍ അധ്യാപക യോഗ്യതാ പരീക്ഷയായ കെ- ടെറ്റ് ആരംഭിച്ചത്. സ്‌കൂള്‍ അധ്യാപക നിയമനത്തിന് സര്‍ക്കാര്‍ ടെറ്റ് നിര്‍ബന്ധമാക്കുകയും ചെയ്തിട്ടുണ്ട്.എല്‍ പി അധ്യാപകരാകാന്‍ കാറ്റഗറി ഒന്ന്, യു.പി അധ്യാപകരാകാന്‍ കാറ്റഗറി രണ്ട്, ഹൈസ്‌കൂള്‍ വിഭാഗത്തിനു കാറ്റഗറി മൂന്ന്, ഭാഷാ അധ്യാപകര്‍, സ്‌പെഷലിസ്റ്റ് അധ്യാപകര്‍ എന്നിവര്‍ക്ക് കാറ്റഗറി നാല് എന്നിങ്ങനെയാണ് കെ -ടെറ്റ് പരീക്ഷകള്‍ നടന്നുവരുന്നത്. കാറ്റഗറി ഒന്ന് വിജയിച്ചാല്‍ അത് എല്‍.പി വിഭാഗം അധ്യാപക നിയമനത്തിന് മാത്രമാണ് ഇതുവരെ പരിഗണിച്ചിരുന്നത്. യു.പി വിഭാഗം അധ്യാപകരാകാന്‍ കാറ്റഗറി രണ്ടു തന്നെ വിജയിക്കണം എന്നായിരുന്നു നിബന്ധന. എന്നാല്‍ പുതിയ തീരുമാന പ്രകാരം രണ്ടില്‍ ഏതെങ്കിലും ഒന്നില്‍ വിജയിച്ചാല്‍ എല്‍.പി, യു.പി വിഭാഗങ്ങളില്‍ അധ്യാപകരാകാം. കാറ്റഗറി മൂന്ന് വിജയിച്ചവരെ കാറ്റഗറി രണ്ടു നേടുന്നതില്‍ നിന്നും ഒഴിവാക്കി.
നെറ്റ്, സെറ്റ് , എംഫില്‍, പി.എച്ച്.ഡി, എം.എഡ് യോഗ്യതകള്‍ ഉള്ളവര്‍ക്ക് കെ- ടെറ്റ് നാല് കാറ്റഗറികളിലും ഇളവു ലഭിക്കും. ദേശീയ തലത്തില്‍ നടത്തുന്ന യോഗ്യതാ പരീക്ഷയായ സി -ടെറ്റ് (സെന്‍ട്രല്‍ ടീച്ചര്‍ എലിജിബിലിറ്റി ടെസ്റ്റ്) പ്രൈമറി സ്റ്റേറ്റ് വിജയിച്ചവരെ കെ- ടെറ്റ് കാറ്റഗറി ഒന്ന് നേടുന്നതില്‍ നിന്നും, എലമെന്ററി സ്റ്റേജ് വിജയിച്ചവരെ കെ-ടെറ്റ് കാറ്റഗറി രണ്ടില്‍ നിന്നും ഒഴിവാക്കിയിട്ടുണ്ട്. 2012 മാര്‍ച്ച് 31 നു മുന്‍പ് സര്‍വിസില്‍ പ്രവേശിച്ച സര്‍ക്കാര്‍, എയ്ഡഡ് അധ്യാപകര്‍, അനധ്യാപകര്‍ എന്നിവര്‍ക്ക് പ്രമോഷന്‍ ലഭിക്കണമെങ്കില്‍ കെ- ടെറ്റ് നേടണം എന്ന നിബന്ധനയും ഇല്ല. ഈ അധ്യയനവര്‍ഷം ദിവസവേതനാടിസ്ഥാനത്തില്‍ നടത്തുന്ന നിയമനങ്ങളില്‍ കെ -ടെറ്റ് യോഗ്യതയുള്ളവര്‍ ഇല്ലെങ്കില്‍ യോഗ്യത ഇല്ലാത്തവരെയും പരിഗണിക്കാം.