റിയാദ്: സഊദി കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്റെ അമേരിക്കന്‍ സന്ദര്‍ശനത്തോടനുബന്ധിച്ച് യു.എസും സഊദിയും തമ്മില്‍ മള്‍ട്ടി ബില്യണ്‍ ഡോളറിന്റെ ആയുധക്കരാറില്‍ ഒപ്പിട്ടു.
വിവിധതലത്തിലും പരിധിയിലുമുള്ള മിസൈലുകളടക്കം യുദ്ധമുഖത്ത് തന്ത്രപ്രധാനമായ ആയുധങ്ങളാണ് സഊദിയിലേക്ക് ഒഴുകുക. അമേരിക്കന്‍ സൈനിക ആസ്ഥാനമായ പെന്റഗണില്‍ വച്ചുനടന്ന കൂടിക്കാഴ്ചക്കുശേഷം അമേരിക്കന്‍ പ്രതിരോധ സെക്രട്ടറി ജെയിംസ് മാറ്റിസ് ആണ് ഇക്കാര്യം വ്യക്തമാക്കിയത്.
ടി.ഒ ഡബ്ല്യു വിഭാഗത്തിലെ മിസൈലുകളടക്കം ഇതോടെ സഊദിക്ക് സ്വന്തമാകും. വിവിധ ഇനത്തിലുള്ള 6,600 മിസൈലുകളാണ് സഊദിക്ക് അമേരിക്ക നല്‍കുക. ഇതിനായി ഒരു ബില്യണ്‍ ഡോളറിന്റെ കരാറിലാണ് ഒപ്പുവച്ചിരിക്കുന്നത്. ട്യൂബ് ലോഞ്ചഡ്, ഒപ്റ്റിക്കലി ട്രാക്ട്, വയര്‍ ഗൈഡഡ് മിസൈലുകളായിരിക്കും ഇവ.
കൂടാതെ 670 മില്യണ്‍ ഡോളറിന്റെ അത്യാധുനിക ടാങ്ക് പ്രതിരോധ മിസൈലുകളും യുദ്ധ ഹെലികോപ്റ്റര്‍ മെയിന്റനന്‍സിനായി 106 മില്യണ്‍ ഡോളറിന്റെയും കരസേന വിഭാഗത്തിലെ ആയുധങ്ങള്‍ക്കായി 300 മില്യണ്‍ ഡോളറിന്റെയും കരാറുകളില്‍ ഒപ്പിട്ടിട്ടുണ്ട്.പെന്റഗണിലെത്തിയ കിരീടാവകാശിക്ക് ഉജ്ജ്വല വരവേല്‍പ്പാണ് നല്‍കിയത്.