വിജയവാഡ: ദക്ഷിണ മേഖല അണ്ടര്‍ 23 വനിതാ ടി20 ക്രിക്കറ്റ് ടൂര്‍ണമെന്റില്‍ കേരളം ക്വാര്‍ട്ടര്‍ ഫൈനലിലേക്ക് മുന്നേറി. അവസാന ലീഗ് മത്സരത്തില്‍ കേരളം കര്‍ണാടകയെ അഞ്ച് വിക്കറ്റിന് പരാജയപ്പെടുത്തിയാണ് ക്വാര്‍ട്ടറിലേക്ക് കടന്നത്.
ദേവിനേി വെങ്കിടരമണ പ്രണീത ഗ്രൗണ്ടില്‍ നടന്ന മത്സരത്തില്‍ ടോസ് നേടി ആദ്യം ബാറ്റ് ചെയ്ത കര്‍ണാടകയ്ക്ക് 20 ഓവറില്‍ ഏഴ് വിക്കറ്റ് നഷ്ടത്തില്‍ 82 റണ്‍സ് മാത്രമാണ് എടുക്കാന്‍ സാധിച്ചത്. വിജയം തേടിയിറങ്ങിയ കേരളത്തിന്റെ വനിതകള്‍ 16 ഓവറില്‍ അഞ്ച് വിക്കറ്റ് നഷ്ടത്തില്‍ 83 റണ്‍സെടുത്താണ് വിജയവും ക്വാര്‍ട്ടര്‍ ബര്‍ത്തും ഉറപ്പാക്കിയത്.
33 പന്തില്‍ നാല് ഫോറുകളുടെ അകമ്പടിയില്‍ 44 റണ്‍സെടുത്ത് അക്ഷയ എ വിജയത്തിലേക്കാവശ്യമായ റണ്‍സിന്റെ പകുതിയിലധികവും സംഭാവന നല്‍കിയപ്പോള്‍ മറ്റ് താരങ്ങള്‍ക്ക് പിന്തുണ നല്‍കേണ്ട ചുമതല മാത്രമേ ഉണ്ടായിരുന്നുള്ളു. കേരളം വിജയത്തിലെത്തുമ്പോള്‍ 14 റണ്‍സുമായി മിന്നു മണി പുറത്താകാതെ ക്രീസിലുണ്ടായിരുന്നു.
ആദ്യം ബാറ്റ് ചെയ്ത കര്‍ണാടകയെ മൂന്ന് വിക്കറ്റ് വീഴ്ത്തിയ അനീന മാത്യുവിന്റെ ബൗളിങാണ് വെട്ടിലാക്കിയത്. നാലോവറില്‍ 14 റണ്‍സ് മാത്രം വഴങ്ങിയാണ് താരം മൂന്ന് വിക്കറ്റുകള്‍ പിഴുതത്. ജിപ്‌സ ജോസഫ്, മിന്നു മണി, ക്യാപ്റ്റന്‍ സജന എസ് എന്നിവര്‍ ഓരോ വിക്കറ്റുകള്‍ വീഴ്ത്തി അനീനയെ പിന്തുണച്ചു. 35 റണ്‍സെടുത്ത ക്യാപ്റ്റന്‍ ദിവ്യയാണ് കര്‍ണാടകയുടെ ടോപ് സ്‌കോറര്‍. ഡി വൃന്ദ 25 റണ്‍സെടുത്തു.
ലീഗ് റൗണ്ടില്‍ നേരത്തെ കേരളം ഹൈദരാബാദ്, ഗോവ, തമിഴ്‌നാട് ടീമുകളെയും കീഴടക്കിയിരുന്നു. ആന്ധ്രയോട് മാത്രമാണ് കേരളം പരാജയപ്പെട്ടത്. മുംബൈയിലാണ് ക്വാര്‍ട്ടര്‍ ഫൈനല്‍ മത്സരങ്ങള്‍.