കോഴിക്കോട്: സ്ഥിര നിയമനം ഇല്ലാതാക്കി തൊഴില്‍ നിയമം ഭേദഗതി ചെയ്ത കേന്ദ്ര സര്‍ക്കാര്‍ നടപടിക്കെതിരേ ദേശ വ്യാപകമായി പ്രക്ഷോഭം സംഘടിപ്പിക്കുമെന്ന് ഡി.വൈ.എഫ്.ഐ അഖിലേന്ത്യാ പ്രസിഡന്റ് പി.എ മുഹമ്മദ് റിയാസ്. ഇതിന് മുന്നോടിയായി രാജ്യത്തെ എല്ലാ ജില്ലകളിലും 28ന് കേന്ദ്ര സര്‍ക്കാര്‍ ഓഫിസുകളിലേക്ക് മാര്‍ച്ച് നടത്തുമെന്നും റിയാസ് കോഴിക്കോട്ട് വാര്‍ത്താസമ്മേളനത്തില്‍ പറഞ്ഞു.
1946ലെ സെന്‍ട്രല്‍ ഇന്‍ഡസ്ട്രിയല്‍ എംപ്ലോയ്‌മെന്റ് ആക്ട് ഭേദഗതി ചെയ്ത കേന്ദ്രസര്‍ക്കാര്‍ നടപടി തൊഴിലാളി വിരുദ്ധവും യുവജന വിരുദ്ധവുമാണ്. ഇതിനു പിന്നില്‍ വ്യാവസായിക ലോബിയാണ്. പ്രകടന പത്രികയില്‍ പ്രതിവര്‍ഷം രണ്ടുകോടി തൊഴില്‍ നല്‍കുമെന്ന് വാഗ്ദാനം ചെയ്ത മോദി സര്‍ക്കാര്‍ യുവജനങ്ങളെ വഞ്ചിക്കുകയാണെന്നും അദ്ദേഹം കുറ്റപ്പെടുത്തി. ഏപ്രില്‍ ഒന്ന്, രണ്ട് തിയതികളിലായി ചെന്നൈയില്‍ ചേരുന്ന കേന്ദ്ര കമ്മിറ്റി യോഗത്തില്‍ പ്രക്ഷോഭത്തിന്റെ തുടര്‍ നടപടികള്‍ ചര്‍ച്ച ചെയ്യുമെന്നും ഭേദഗതി പിന്‍വലിച്ചില്ലെങ്കില്‍ കേന്ദ്ര മന്ത്രിമാര്‍ക്കെതിരേ പ്രതിരോധം തീര്‍ക്കുന്നതടക്കമുള്ള പ്രതിഷേധം സംഘടിപ്പിക്കുമെന്നും അദ്ദേഹം പറഞ്ഞു. അതേസമയം പ്രക്ഷോഭത്തിന് യൂത്ത്‌കോണ്‍ഗ്രസ് അടക്കം ഏത് സംഘടനകളുമായി കൈകോര്‍ക്കാന്‍ തയാറാണെന്നും മുഹമ്മദ് റിയാസ് പറഞ്ഞു.