ചങ്ങനാശേരി: കവിയൂര്‍, വാഴൂര്‍ റോഡുകളിലെ ടിപ്പറുകള്‍ മത്സരയോട്ടം ജന ജീവനുകള്‍ക്ക് ഭീഷണി ഉയര്‍ത്തുന്നു. മരണപ്പാച്ചില്‍ കാരണം ടിപ്പറുകളില്‍നിന്ന് റോഡിലേക്ക് മണ്ണ് വീഴുന്നതും പതിവാണെന്ന് നാട്ടുകാര്‍ പറയുന്നു.
കഴിഞ്ഞ ദിവസം കൊച്ചു റോഡില്‍ ടിപ്പറില്‍നിന്ന് മണ്ണു വീണതിനെ തുടര്‍ന്ന് നാട്ടുകാര്‍ ടിപ്പര്‍ ലോറികള്‍ തടഞ്ഞിരുന്നു. അതേസമയം കടുത്ത വേനലും കുടിവെള്ളക്ഷാമം രൂക്ഷമായിട്ടും താലൂക്കിന്റെ വിവിധ പ്രദേശങ്ങളില്‍ മണ്ണെടുപ്പ് വ്യാപകമാണെന്ന ആക്ഷേപവും ഉയരുന്നുണ്ട്.
ട്രിപ്പ് കൂടുന്നതിന് അനുസരിച്ച് കമ്മിഷന്‍ കൂടുമെന്നതിനാല്‍ കടിഞ്ഞാണില്ലാതെയാണ് ടിപ്പറുകള്‍ പായുന്നത്. കഴിഞ്ഞ മൂന്നുമാസത്തിനിടയില്‍ വലുതും ചെറുതുമായ നിരവധി അപകടങ്ങളാണ് ഉണ്ടായത്.
ടിപ്പറുകളുടെ അമിതവേഗം നിയന്ത്രിക്കുന്നതിനും യാത്രക്കാര്‍ക്ക് ബുദ്ധിമുട്ട് സൃഷ്ടിക്കാത്ത വിധത്തില്‍ മണ്ണ് മൂടിക്കെട്ടി കൊണ്ടുപോവുന്നതിനുമുള്ള നടപടി സ്വീകരിക്കണമെന്നാണ് നാട്ടുകാരുടെ ആവശ്യം.