റിയാദ്: ഞായറാഴ്ച്ച രാത്രി സഊദിക്ക് നേരെ നടന്ന കൂട്ട മിസൈല്‍ ആക്രമണത്തിനെതിരേ വിവിധ രാജ്യങ്ങള്‍ ശക്തമായി അപലപിച്ചു. ഏഴ് മിസൈലുകള്‍ സഊദിക്ക് നേരെ തൊടുത്തു വിട്ട ഹൂതി നടപടി കിരാതവും അപലപനീയവുമാണെന്ന് സഖ്യ രാജ്യങ്ങള്‍ പ്രസ്താവനയില്‍ വ്യക്തമാക്കി. അറബ് രാജ്യങ്ങളായ കുവൈത്ത്, ബഹ്‌റൈന്‍, ജോര്‍ദാന്‍, യു.എ.ഇ, ഫലസ്തീന്‍ തുടങ്ങിയ രാജ്യങ്ങളാണ് സഊദിക്ക് ശക്തമായ പിന്തുണ പ്രഖ്യാപിച്ചത്.
സഊദിക്കെതിരേ നടന്ന കൂട്ട മിസൈല്‍ ആക്രമണത്തെ ശക്തമായി അപലപിക്കുന്നതായി കുവൈത്ത് വിദേശ കാര്യ മന്ത്രി വ്യക്തമാക്കി.
സമാധാന നീക്കങ്ങളോട് ഹൂതികള്‍ പുറം തിരിഞ്ഞു നില്‍ക്കുന്നതിന് തെളിവാണ് ആക്രമണമെന്നും കുവൈത്ത് കൂട്ടിച്ചേര്‍ത്തു.
തങ്ങളുടെ സഹോദര രാജ്യമായ സഊദിക്കൊപ്പമാണ് യു.എ.ഇ നിലക്കൊള്ളുകയെന്ന് യു.എ.ഇ വിദേശ കാര്യ മന്ത്രാലയം പുറത്തിറക്കിയ പ്രസ്താവനയില്‍ വ്യക്തമാക്കി. മിസൈല്‍ ആക്രമണങ്ങള്‍ ഇറാനിയന്‍ ആയുധങ്ങളെ പ്രതിഫലിപ്പിക്കുന്നതും മേഖലയിലെ സുരക്ഷയും സ്ഥിരതയും അസ്ഥിരപ്പെടുത്തുന്നതിന് പ്രേരിപ്പിക്കുന്നതുമാണെന്ന് യു.എ.ഇ കൂട്ടിച്ചേര്‍ത്തു. ഫലസ്തീന്‍ പ്രസിഡന്റ് മഹ്മൂദ് അബ്ബാസും ശക്തമായി പ്രതിഷേധിച്ചു.